曾智華
每日早餐後，我例牌行過茶記隔籬超市睇睇，睇乜？睇有冇「突然筍價」貨。主要兩樣貨品，第一是紅酒，第二是雞湯。
紅酒日日飲，晚餐聚會社交活動耗用不少。
雞湯又如何？也是日日用。N年前開始食「公仔麵」（所有即食麵代用詞），喜歡飲埋碗「毒藥湯」（即附設的味粉湯），刺激又好味。飲飲\u5413，咦，發覺唔掂，喉乾舌燥外，間中更會有皮膚病反應，立即停。加上慢慢開始識飲識食，當然再冇興趣飲化學調味品湯，況且長飲對健康肯定有壞處。
咁點？戒毒藥湯後，最方便用小磚的加樂牌雞精開湯；再之後，盒裝史雲生雞湯誕生，從此方便得多，凡煮湯麵，熟後就放入雞湯，如此一碗好味的雞湯麵就搞掂，次次連湯飲埋。
雞湯用途多多，基於味鮮，飲完唔口渴，且真正用大量雞燉，於是大部分酒家廚師都用來代替高湯，因自己用老雞火腿熬，一方面要花長時間，同時人工及成本也貴得多。若改用十多元一盒雞湯，一公升可用多次。
起初整個雞湯市場史雲生霸晒，但發展越來越快，開始法國的亨氏（Heinz）加入爭生意，但後者叫價太貴，超過30元，難爭；直至兩年前出現家樂牌雞湯，從此大戰開始。
雞湯一面打一面降價，由N年前二十多蚊一盒，打到變十幾蚊，未夠，最近更打到割喉，簡直標血！
剛剛上網睇，兩盒裝史雲生一公升雞湯叫價39元，即18.5元一盒，家樂牌就23.8元，亨氏最貴32元。
你可知近呢幾日戰況慘烈成點？突然史雲生及家樂牌三包一公升裝去到26元，即8.7元一公升，簡直跳樓價！我二話不說，掃兩打，擺到通屋都係又點話。
