今年首個黑雨警告昨早（29日）約9時多懸掛兩小時，有網民投訴昨在旺角一間連鎖酒樓飲早茶時，早上8點多入座時未掛黑雨，到10點左右埋單突被收取「黑雨價」，茶位點心樣樣都「突然」被加價，掀起熱議。
不少網民嘖嘖稱奇表示「第一次聽」：「颱風價就聽過，黑雨價就真係聞所未聞。」「打風就有，未聽過咩黑雨價。」
涉事酒樓的經理今早（30日）回覆《星島頭條》查詢，承認昨日有收取茶客「黑雨價」，她指是公司規定，集團旗下9間分店均有收取，有關收費在點心紙中已有註明。
旺角連鎖酒樓要收「黑雨價」掀議 點心茶位加「咁多」 茶客投訴畀錢先知 經理回應咁解釋↓↓↓↓
有網民昨在社交平台發帖投訴一間連鎖酒樓「收咩黑雨錢」，涉事酒樓疑似位於旺角，在本港有9間分店。他在帖文中表示：「8點幾到（酒樓），9:10先黑雨，10點幾埋單，先知茶位每人加價每碟加價。」
天文台在昨早9時10分至11時05分，懸掛今年首個黑色暴雨警告信號，歷時近兩小時。
樓主在黑雨前入座，10時左右埋單時正值黑雨警告信號生效，他批評涉事酒樓「最大問題畀錢先知加價，收咩黑雨錢，茶紙又冇寫明黑雨加價，真係…」。
網民譏「借啲意加價」：聞所未聞 唯有坐到轉紅雨先埋單
帖文引發熱烈迴響，不少對於酒樓收取「黑雨價」感到非常詫異：「颱風價就聽過，黑雨價就真係聞所未聞，可能我孤陋寡聞見識少。」「黑雨價？第一次聽。」「打風就有，未聽過咩黑雨價。」
網民普遍不認同酒樓在黑雨懸掛期間加價：「坐到轉返紅雨先埋單得唔得？」「陣間下次會唔會酷熱天氣警告，要加收冷氣費架。」「幾搞笑，可以有埋細路太嘈嘅太嘈價加$100。」「乜都借啲意加價。」「『黑店』黑雨加價的店嘅簡稱？」
不少網民認為樓主可向消委會作出投訴：「黑雨加價ok，但應該入座起計先公道。」「痴線，入座先話有黑雨價，投訴！！！」「入座前講明就話啫，咁樣埋單先計好有問題。」
涉事酒樓經理：黑雨等同八號風球 收黑雨價已清晰列明
涉事酒樓的經理今早（30日）回覆《星島頭條》查詢時承認，昨日在黑雨懸掛期間有收取茶客「黑雨價」，她指這是公司規定，酒樓集團旗下各分店由開張至今亦均有收取，「因為黑雨等同八號風球既級別，天文台同新聞都有講。」
她解釋黑雨價的收費計算方式，茶客在落單時，若正值黑雨警告懸掛，會收取黑雨價，即價格會與公眾假期收費一樣，每樣點心加價約3元。點心收費以落單時計算，因為已入電腦無法更改，因此在埋單時，若黑雨取消，仍會以黑雨價計算。至於茶位收費，在黑雨警告時，每人加收2元，因在埋單時才收取茶位費，若結賬時已取消黑雨，茶位費不會收取黑雨價。
她指出，有關黑雨價收費已在點心紙中清晰列明，「熟客都知」，否認該茶客指控「畀錢先知」，「佢可能無留意到」。她表示，若一掛黑雨就逐張枱通知茶客改收黑雨價，恐會引起茶客負面感覺，「可能有啲茶客會以為佢哋畀唔起錢咁」。她指，昨日該涉事茶客在結賬時，有向她投訴，事實上該張單只因黑雨收多2元茶位費，當時她願意代該茶客支付但被拒。
來源：sisihuang1214＠Threads
同場加映：旺角酒樓午市狠招鬥快餐店 全包價$ＸＸ罕推「一人餐」 保證20分鐘出餐 網民：適者生存↓↓↓↓
