(曾智華)
一般小投資者，容我講句，多皆感性蓋過理性，兼且自願變「冇常識」，故此多蝕大本，被有牌或無牌騙子誤導。處身盜匪如毛的金融世界內，當然蝕大底變成水魚。
經常有唔忿氣的老友問：「碌Sir，我呢隻股票，冇理由差成咁，幾時有機會見家鄉呢？」
若兜口兜面直斥其非，盞大家冇癮。故此，只好聲好氣解釋：「金錢世界內，一切商品，包括金融商品，例如股票，只有市價，並沒甚麼家鄉價。故此，你一買一賣，就應事先判斷主觀客觀形勢，分析目標股票仲有冇機會升。例如若你早年錯誤買入飲食股翠華（1314），咁就肯定一生一世都去唔返上市價，更遑論歷史高價了。翠華十年前由五元多一路跌，你唔識走，就只有不斷蝕，到如今，兩毫子都冇，死未？」
翠華衰成咁，當然有一百個理由，我無謂公開，亦冇氣分析。總之，呢類股正是典型永遠冇家鄉價的渣股，持有者若幻想有機會重見家鄉，真係豬頭人了。
另外，小弟N咁多年前已不停向讀者解釋，咪信與地產界有利益掛\u920e者亂\u564f，要用腦分析班友仔不停宣揚的謬論。
其中之一為——香港樓市冇得跌！因：一、有極剛強需求；二、地價成本高；三、建築成本及人工只會升不會跌。三點夾埋，就得到結論——樓價永遠只升不跌，冇得平！
其實，讀過BB經濟學的\u510d瓜學生都應知，一切商品定價，只講供求，不講成本！樓，絕對是商品，怎可有例外？我幾年前見到樓價癲晒，不停提這個基本理論，可惜人微言輕，敵不過地產利益大集團，唯有等天然「地心吸力」出現。
今天你會否仍堅持物業非普通商品，故此冇得跌呢？
