上周日幾好玩，我雖未至衰鬼大翻身，但早在此指出，兩場三級賽，兩大馬房各出三隻，足以操控大局，故此，要中不太難。奇在兩隻W出的皆相當超賠率，尤其呂廄「合夥奔馳」，完全冇公眾飛，故閘前五分鐘竟冷到四十二倍。
小弟根本唔知會開邊隻，唯有三隻買晒。幕後人當然知啦，開閘前，大 聰明錢幾秒內 落去，四十二倍打到落二十六倍，呢鋪食到嘔 。
董明朗乃一位長期被忽略的騎師，故才有如此好分。其實，董明朗長期冇乜馬騎，今季只出賽二百一十四次，但原來能夠拼入前五名的，竟達五十六次，即馬主搵佢騎，有超過四分一機會收獎金，相當唔錯 。
當日另一談論點為第一場，有隻馬搞到屍橫遍野，正是隔夜開飛最冷的「萬里雲」。
點解會死咁多人？大部分馬迷慣性睇飛下注，因心態上認為只有幕後人才知及決定邊隻去或唔去。去，當然真金白銀落飛，令目標越買越熱；至於冇心去的，自然不會浪費子彈，必定越來越冷。呢類情況究竟準唔準？個人經驗，起碼八成準，但也有一兩成，跣到你攤攤腰。
「萬里雲」正是最佳例子，賠率一直是過百倍，顯示全無機會。但奇，唔知邊個 佬嫌錢腥，閘前十分鐘突然倒水咁落注，倒到變啡燈。公眾馬迷見有人咁瘋狂，必定事出有因，於是引起落飛的雪球效應。
還是本報馬經版黃老總明察：「真係得，邊會咁早落 ，畀你知咪分少好多？」
結果，二十四倍開跑，輸十七個馬位，尾二，呢場「執屍大隊」執到手軟也。
上周日田雞全家遠道而來，著晒西裝落沙圈，結果佢爆出二十四倍「弦力寶」。今晚若家人未走，仍可捧「萬事靚」及「奮鬥輝煌」 。
