曾智華
一連幾日的英國皇家雅士谷大賽，真真唔多好睇，亦唔多好玩。本來呢項賽事，全球殿堂高手雲集，作極級騎技較量，理應好睇到爆炸。不過，事實唔係。點解？因大會攝影機的擺位好差，不利馬迷知道邊隻打邊隻，餐餐只見一群馬在跑，遠鏡之下，好難分騎師與馬匹。
其實，不少城市大賽，早已長短鏡互用之外，更會打出放領馬的編號，讓馬迷知道自己下注的一匹大約在甚麼位置。
英國大賽令馬迷更冇癮，為唔知有乜需要，大部分場次都安排N咁多馬出賽，分分鐘去到三十匹。結果，觀賞賽事時就只見到一堆芝麻咁細的馬在跑，毫無刺激感覺。
這種空群而出式賽事，對於投注者完全冇吸引力。大佬，三十隻陌生馬，點刨？若餐餐玩「盲俠掟飛鏢」，肯定中的機會如「跑馬射蚊鬚」。如此難中，哪有趣味吸引馬迷落注？
當然，一處有一處的文化。但起碼英國馬會應大幅改善直播的鏡頭調動，不可太落後。
論沿途直播，香港馬會真真遠勝英國，尤其頂級賽事，一出大賽鏡頭，清晰度即令觀眾眼前一亮，騎師在最後一百米的死命咬牙切齒拼搏，近鏡做到纖毫畢現，如此，馬迷才會投入。
明天沙田有兩場三級賽，季尾投注應該踴躍。
「精英盃」呂健威出三隻，操控大局，咁就「手機錶霸」、「包裝天將」及「合夥奔馳」，買Q及PQ可啦。
「精英碟」告東尼又係出三隻，加埋徒弟仔巫偉傑馬房，即「告氏家族」有四隻，捉路數，四隻二重彩複式可也，即「和平波」、「美麗同享」、「加州動員」及「又龍串鳳」。買多十蚊「又龍串鳳」位置，因報名時，告仔本用鍾易禮騎，最後換班德禮，可能是特別安排！
