早晨茶記乜人都有，有人手機睇YouTube，有人教仔，有人開「城市論壇」議論時事，師奶們則多交換消費訊息。
小弟只默默查訊息及睇報紙，絕少理會其他人講乜，除非好有吸引性。
呢呢，上周六跑馬的早晨，隔籬 正正有兩位馬迷大叔，在為馬名打睹。
肥大叔：「超，係人都知『人怕生壞命，馬怕改壞名』，你隻馬叫『大番薯』，即係想佢跑到成條番薯咁啦，點贏呀？矮佬，今日有三隻馬，我肯定瓜硬，兩隻太寸，一為『不勞而獲』，二為『後無來者』，另一隻也必定冇運行，馬名衰衰咁叫『整蠱專家』。阿叔我跑馬幾十年，見盡呢類馬名，多數冇W就退役。」
矮佬叔：「你咁醒，就輸賭一餐啦，若果三隻是但一隻有WP，聽朝早餐你埋單，倒轉就我請，殺唔殺？你咁精於研究馬名，咁啦，揀隻必定有WP ，中的話，明早我請你任食。」
肥大叔：「殺你！ ，我認為做人做馬，謙虛者勝。有一隻馬好識自嘲，名『真僥倖』，英文更過癮，廣東話直譯，叫『Truly Fluke』，純符碌，咁Humble，抵佢贏啦。」
矮佬叔：「喂，肥佬，隻馬排十三檔喎，千四米，點攝到埋欄呀？連高手布文上次排靚位都冇W，呢場由次一級騎師艾兆禮執韁，邊有機會呀？」
結果黃昏揭曉，果然肥大叔中正，自大寸寸貢及古怪馬名三匹全瓜直，「真僥倖」夠謙遜，果然勝出，真有點反映處世之道！
今個星期快活谷停戰，遷就英國皇家雅士谷賽期，跑足五日。真正喜歡欣賞賽馬者，必定大樂，因當今世上最頂級高手，幾乎全在歐洲，尤其英國。我會日日擔 仔純以觀摩角度睇，每場只選一隻買WP考眼光。
