有收銀員拒收貼有膠紙的「受傷」50蚊紙後，遭顧客貼圖在網上公審，但有關顧客卻圍爐失敗，反遭網民圍攻狂轟，有人不客氣地開火：「有問題的是你！出帖博圍爐！你自己都知張銀紙有問題啦！迫人收！」、「你去買嘢都係想用咗張爛銀紙啫，人哋唔收你就發脾氣」、「首先問自己，如果張銀紙有問題嘅話，你本人收唔收啊」。（下文另附處理爛銀紙的金管局官方說法）詳情見下圖及下文：
收銀員拒收貼膠紙「受傷」50蚊 顧客貼圖公審反遭網民圍攻逐張睇↓↓↓↓
樓主發文公審
樓主早前投稿facebook群組「西店Hi客之道」，帖文以「50蚊紙有咩錯」為題，力數金毛收銀員的不是：
「買嘢嗰陣時俾50蚊紙找數點知店員好串咁話唔收。
我：吓，點解唔收？
金毛仔收銀：你用膠紙貼過我哋係唔會收嘅。
我：呢張又唔係假銀紙，你拎去照下咪知係咪真囉。
金毛仔收銀：總之唔收，你俾過第二張我。
咁我咪唯有唔買囉，真係唔知原來而家啲收銀權力大到有權揀錢嚟收，所以唔好話冇生意，一切都係自己做成，請埋呢啲冇家教嘅𡃁仔又唔做培訓，淨係識得趕客，想人留喺香港都難啦」。
相關閱讀：用紫色50元紙幣增值失敗 港男呻便利店職員竟以一原因拒收……
網民幾乎無一撐樓主
醒目的網民看過公審帖文的內容後，幾乎無一撐樓主。樓主如今圍爐失敗反遭網民群起圍攻，較溫和的網民跟樓主講道，並教路到發鈔銀行更換：
•交俾銀行有得搞；
•攞返去渣打有無得救；
•崩咗隻角都有權唔收㗎；
•做收銀都要同老細交代㗎；
•收銀冇問題！ 你自己反思下啦；
•乖，損耗嘅貨幣，得銀行可以收的，親；
•人哋真係可以唔收，有損毀嘅貨幣應該自己去銀行換；
•無知不是罪，人蠢冇藥醫，仲要擺上網，架就攞嚟丟；
•可以拎返去，發鈔銀行會做鑑定，之後Ok可以換返張；
•佢就係唔知幾時收咗，覺得自己Ｘ咗，唯有盡快掉出街；
•首先問自己，如果張銀紙有問題嘅話，你本人收唔收啊；
•究竟係時代變遷定啲人智商退化，乜Ｘ都以為可以公審；
•自己冇認知怪人哋唔收！損壞咗嘅貨幣要攞返去發鈔銀行回收。
相關閱讀：茶餐廳拒收披口廿蚊紙 食客嬲嬲 爛銀紙究竟用唔用得？金管局咁講……
另有處事嚴肅的網民，更加不客氣地對樓主破口大罵：
•唔係話香港服務業有幾好，但係有陣時遇著呢啲自以為是，又死要面㗎西客都真係幾慘！
•有問題的是你！出帖博圍爐！你自己都知張銀紙有問題啦！迫人收！你真係衰格到冇人有！
•好簡單，收咗唔用得老細叫還錢，你會賠嗎？係個人都唔想賠，所以直接唔收。我最多講句去銀行換返佢；
•爛咗做咩要收呀，唔好買囉。買50蚊嘢以為自己好大支嘢，你去買嘢都係想用咗張爛銀紙啫，人哋唔收你就發脾氣；
•其他錢唔肯俾或者喺八達通等等，你全身得嗰50蚊？如果唔係嘅話擺就明玩嘢啦！你將有問題嘅貨幣俾人，人哋打份工你想跣人一鑊；
•店舖有權唔收，你可以拿回發鈔銀行換回一張正常鈔票，呢個係常識，只不過係你自己懶，唔想去排隊换，店舖亦無義務因為你懒而幫你做工作以外的事情；
•其實張錢有問題，係有權唔收，理應自己拎番去銀行更換，我試過有個客俾張過完洗衣機嘅錢我，變晒形，唔好意思真係唔收，呢個位職員係有負任幫公司把關唔收有損壞嘅錢幣；
•香港實在太多你呢種自以為是嘅傻Ｘ，莫講你膠紙貼住，就算你銀紙崩咗個角商戶都有權拒收要你提供其他紙幣。不過有啲收銀厭麻煩／無睇清楚照收咁解唧。咁都要擺上網，好在啲人都係插Ｘ你，證明香港都仲好多正常人。
另有網民分享自己的經驗：
•係可以唔收，所以啲店找錢時要睇清楚，上次有間店又係俾咗爛嘅，搞到我要去銀行換。
•一定唔收啦，仲要晒時間去銀行排隊換過張。試過有次有個Mk（旺角）仔俾張冇咗3分1嘅錢我，我唔收，佢話唔買，之後隔咗5分鐘有第二個女仔嚟俾同一張我，仲要摺埋咗，我見到即刻話唔好意思，我已經同上一個男仔講咗我哋公司唔俾收爛銀紙，唔使再試啦，最後佢勁尷尬咁行走咗（後面排晒隊）。
鈔票損毀點算好 金管局咁講↓↓↓↓
在回應欄上，不少網民給樓主教路，指銀紙破損可以到銀行更換。就遇上鈔票被塗污或損毀情況，金管局之前則教落市民應該咁做↓↓↓↓
在金管局facbook，局方之前曾以「爛銀紙都係錢？」為題發帖，指出「如果銀紙崩咗角、污漕咗，有輕微破損係可以繼續用，但最好拎返發鈔銀行，當銀行驗證咗係真鈔、損毀面積冇超過四分一、防偽特徵完整，一般都會換返錢畀市民嘅」。而在金管局網站的「常見問題——紙幣和硬幣」部分，官方就這問題作解釋——「被塗污或破損的鈔票能否被銀行接受及兌回鈔票原值？」，指：
「一般而言，紙幣上如有塗污或損毀情況，可能會出現其他市民或商戶不願接納的情況，所以鈔票持有人應盡量保持鈔票完好，以保障自身利益。
如遇到塗污或損毀情況，市民可向有關發鈔銀行要求兌換。發鈔銀行會根據既定的準則來驗證真鈔，例如塗污或損毀程度、防偽特徵是否完整，決定可否兌回原值，由於每張鈔票的塗污或損毀情況會有不同，銀行會個別考慮」。
金管局並在網頁的「紙幣冷知識」欄目下，設生動的情景題解畫：
阿四：小森，頭先食飯每人夾88蚊，你仲未畀返我！
小森：你睇下啦，我銀包得返一張「紅衫魚」，上面仲崩咗一個角，唔畀得你。
阿四：銀紙爛咗都係錢，點解唔畀得我？
小森：你有所不知，損壞咗嘅紙幣係有可能唔被接受做法定貨幣㗎。
阿四：如果唔覺意收到張霉霉爛爛嘅銀紙，咁點算好？
小森：崩咗角、污漕咗嘅銀紙仍然用得㗎，但如果你覺得唔順眼，最好都係拎返發鈔銀行回收。一般嚟講，銀行會驗證張銀紙係咪真鈔、損毀面積有冇超過1/4、防偽特徵係咪完整，無以上問題就可以兌返錢。
資料來源：西店Hi客之道＠facebook
相關閱讀：觀塘乘客豪擲古董錢幣搭車 收藏家：值2萬元一枚 小巴公司竟因一原因拒收↓↓↓↓
時光倒流。2024年10分，有小巴乘客竟然使用有幾十年歷史的貨幣作車資，被小巴公司圖文並茂貼告示，以因一原因為由表明拒收。識貨的網民則爭相留言指舊貨幣「值錢」，用來搭車好比倒錢落海。
對於有人豪擲大推5仙銀仔（俗稱「斗零」）搭車，網民恨得牙癢癢，揚言「好想要」，甚至要「大量收購」，有人妻更加留言稱「我99（奶奶）前排話，她朋友講一個5仙值$2000」。而在兩三年前，更有收藏專家指1964年的5仙市面炒價高達2萬元起↓↓↓↓
