(曾智華)
過去幾年，凡新片上映，小弟必定第一時間入場，之後發布觀後感。好的，大力推介；差的，輕輕指出再帶過，無謂壞人飯碗。
過去三周不停有讀者問：「碌Sir，點解未見你寫《水餃皇后》？唔睇？」
並非唔睇，而是早知此片能帶我輩上世紀五十年代出生，六十、七十年代長大，七十、八十年代經歷香港巨變（其實近年也是）的「老友記」，齊齊走入時光隧道，重現一幕又一幕人生印記。
所以月初就決定召集六十位同輩，大家背景相若的，到高先戲院包場齊齊欣賞，齊齊笑，齊齊喊。訂場需時，故拖到上周末。不出所料，六十人似坐上飛越時光的大巴士，沿途見回昔日有極深感受的場景，一邊睇，固然一邊笑，但在我身後的，尤其女性，竟有過半時間在飲泣，共鳴感甚深也，因大家也是由一窮二白，住板間房，被人歧視睇低長大，然後一步步捱到出人頭地，當中充滿血淚汗，「水餃皇后」臧姑娘正是人辦。
上周評論過《獵金．遊戲》，指出就算是香港導演、香港演員，但只要是國產的，就會有道無形隔膜。
但《水餃皇后》呢，主角是內地演員，女的是馬麗，男的是朱亞文，就是能例外地贏得香港觀眾好感，點解？這「化學作用」有排解釋。
劇終，字幕徐徐升起，全場鼓掌。鼓掌原因並非因金像獎導演劉偉強拍出了甚麼驚世之作，事實，此非佢代表作。掌聲其實是向離世的臧姑娘致敬。上年紀的香港人，無不在成長過程中，自己體驗或見盡無數「臧姑娘」，一生無怨無悔，無論多艱苦，咬咬牙抱一個\u5b6d一個拖一個就捱下去，直至子女一個個成長。
這份精神，隨著社會變遷，很難重現了。
