由MIRROR隊長楊樂文（Lokman）與王智德（Alton）及ERROR成員何啟華（阿Dee）合資開設的餐廳「泰鳩」昨日（5日）正式結業，三位星級老闆於餐廳落閘一刻現身舖頭，對於餐廳結業，三人表現輕鬆，Lokman坦言沒有不開心，更指現在先休息，儲夠子彈有緣再見！ 文、圖：娛樂組
餐廳結業當晚10點左右關門，食客也陸續離開，臨別前都紛紛與招牌合照，約20分鐘後，戴着帽及口罩的阿Dee、Lokman及Alton同時到達餐廳，三人狀態也不錯，心情亦沒異樣，被要求跟店舖合照時，阿Dee見招牌被捲閘遮住，更笑言好貼合主題。
阿Dee : 關關難過關關過
對於餐廳結業，Lokman表示心情輕鬆，沒有不開心，阿Dee就指結業在這時勢也算是一個正確決定，始終敵不過這世界：「𠵱家始終關關難過關關過，香港人有啲關過咗唔返嚟，個時勢就係有啲關過咗返唔到轉頭，可能我哋要等下一關。」Lokman即指下一關就是一個新階段，但也可能有另一種關口，至於Alton就笑言身為一個出色的商人，應該要做出明智的決定。問到投資是否已回本？Lokman表示始終要交學費：「嗰啲就唔好提，乜嘢都要學，你唔係淨係贏，個個都贏就唔好玩。（餐廳係咪會以另一種形式再出現？）有緣再見啦，過一段時間先，再學習多啲嘢儲多啲子彈先。」
Alton最感安慰多人表示不捨
阿Dee就謂大趨勢是這樣也沒辦法，又坦言若捱得住都會想繼續，因想有一個以理念行先的地方，但都很開心這地方令大家有很多好的回憶：「賺唔賺錢呢啲講命運，留言都識講，明星搞餐廳死硬，哈哈哈，佢哋又可以留言喇！但……係有啲可惜嘅。」至於租金是否主要問題？Lokman解釋因店舖不斷更新，雖然他們打法不斷改變，但世界原來也不斷在變：「最尷尬係啲租、合約問題都要面對。（藝人做生意會否較蝕底？）呢樣嘢冇得擔心，控制唔到，呢個係人哋範圍，我哋只可以有咩關過我哋就打，唞唞先啦！」阿Dee指大家都會願意配合大環境，亦有很多業主願意主動減租：「但都唔係呢個問題，始終有啲關過咗就返唔到轉頭，𠵱家香港做生意係閒日可以搵燈油火蠟，但放假就冇嘢做，個環境係咁，好似今日（5日）公眾假期，10點幾條街就冇人，搞生意𠵱家公眾假期冇嘢做，個市點可以同個天鬥？」對於粉絲們都好期待他們再戰江湖，Alton坦言消息發出後，最感安慰是有很多人講「唔捨得，但明白」：「聽返呢啲就會明白好多人一齊喺遊戲入面，我哋都唔係孤單！」
粉絲打卡送蛋糕
結業當日午市所見、人流不俗，大部分時間都坐了半場客人，員工照常上班，期間仍有講有笑，完全沒半點愁容，食客中也有阿Dee的粉絲專程帶同阿Dee的公仔打卡食飯，而她們都表示趁結業前專誠來支持。此外也有正日生日、來自澳門的蛋白粉（Alton粉絲暱稱）A小姐與兩名鏡粉一起前來慶祝，更特意在餐廳訂了「泰鳩Cake」當生日蛋糕，三人均表示因地方方便兼性價比高，故把這𥚃當成是食堂，對於餐廳結業均感不捨，因這𥚃是鏡粉的聚腳地之一。
