由陳淽菁聲音導航兼任主持的HOYTV節目《 他鄉的煮人》昨晚（28日）舉行首映宴，蘇韻姿、孫慧雪、敖嘉年 、七仙羽 （七師傅）、簡淑兒等出席。陳淽菁坦言該節目無論執導、拍攝，甚至寫稿也很完美，可謂是她參與飲食節目以來最為深刻。她又指在2018年離開TVB，今次首度為HOYTV做飲食節目，更認為回復自由身非常好，現正為電台做節目外，亦會擔任主持工作及企業培訓同自己生意。她說：「依家覺得自由自在可以喺唔同台出現，我哋香港演藝界覺得依家追得上潮流，因為以前韓國、台灣一路都係咁。」
讚麥大力好乖
同場出席的簡淑兒，提到男友麥大力早前升為機師長，談到可會計劃結婚？她笑言如有好消息會同大家講，但男友的人生只圍繞工作，就算傾計都會講飛機，不過她不會覺得好悶。她說：「啲人成日問我唔驚佢成日出去玩，但佢成日好乖，講都係飛機同工作，發覺如果佢出去同其他女仔講呢啲，無人會同佢傾計，（得你識欣賞佢？）係呀！」簡淑兒坦言跟男友有談及結婚話題，但自己不會接受即興註冊結婚，雖然不著重儀式感，不過也需要對方單膝跪地求婚，就算婚後她也會選擇去工作。
自嘲「姐姐剋星」
育有兩子的孫慧雪屢次聘請「極品」工人姐姐，最近她再次出事，更自嘲是「姐姐剋星」，她表示早前聘請一位工人姐姐突然消失，更接獲警方聯絡她。她說：「警察話佢洗咗過百萬黑錢，通緝緊佢。咁我又要聘請姐姐，期間屋企個姐姐又話要嫁有錢人唔做啦！中介公司就話我請緊嗰個姐姐依家話唔嚟，我覺得個天要我湊返，呢段期間自己湊返細仔。」孫慧雪自言沒有「老闆命」，亦未有想過工人姐姐會洗黑錢，但感覺對方好純品，可能被人利用。談到可會嚇怕不敢聘請工人姐姐，她說：「好多人介紹唔同中介公司畀我，今次嗰間想打破宿命，但係打破唔到。（不如開間中介公司？）我依家識咗好多唔同姐姐去幫我喺菲律賓、印尼搵姐姐。不過老公都話與其畀人賺錢，不如自己開條路，係有諗過，但處理客服問題應該好複雜。」提到早前到馬場拉頭馬，孫慧雪笑言奪得冠軍「禪勝輝煌」是老爺名下的馬匹。她說：「嗰日都唔知會贏，好多人都話做乜唔畀貼士，連我爸爸都咁話我。」
