谷祖琳憑電影《爸爸》首度獲提名金像獎「最佳女配角」，除了感激電影製作團隊外，入行27年來遇過的人，也成就了今天的她。而當中最感激父母對她的全程支持，特別是谷爸爸鐵粉式盲撐，既感動又搞笑；其次是首個合作導演陳果，在他震撼教育下成長；仲有默默在身後支持的老公劉穎恆（Andrew），還有如定海神針般存在的「私人補習老師」黃秋生，原來她在《爸爸》「無添加」的演出，亦多得黃秋生教路。採訪：杜杜 攝影：林賓尼 服裝:Isabel Marant
消化了入圍消息後，小谷最感激這27年來遇過的人，「嗰日坐低靜靜哋諗返，呢個提名一定唔係自己功勞，甚至乎唔係淨係呢套戲𠻹！我嘅人生點樣成就咗我呢個人，繼而咁啱有呢個戲、呢次機會，先至可以拿捏到，諗返係我一路以嚟遇到嘅人，覺得好溫暖、安慰，一路身邊都有人同行，真係要多謝佢哋令我行到𠵱家，唔係講得獎感言，都已經要多謝好多人。」
頭號鐵粉谷爸爸
小谷首要多謝當然是父母，特別是她的頭號鐵粉谷爸爸，「《爸爸》佢睇咗2次，以佢70幾歲嘅人，比較文藝嘅戲佢都睇2次，佢仲話第2次好睇好多喎，我唔係淨係睇我啲嘢，會睇埋阿翁（導演翁子光）啲訪問，總之睇晒我周邊啲嘢。」原來當日第1個通知她入圍金像獎，竟不是電影公司而是爸爸，「我執緊屋，爸爸打畀我，問我『點呀？入唔入到圍呀？』我話唔知喎！佢話『幾時知呀？』應該呢幾日啩，佢話『咁我話畀你知啦，你入到喎』，我話係你想之嘛，佢話『公布咗啦！』」提起谷爸爸，她最深刻一幕是入行前，首位經理人Amy約爸爸見面的搞笑情景，「我爸爸係冷面笑匠底，但佢唔知自己滑稽，我最記得Amy話『覺得你個女好好想簽佢』，我爸爸反應係『吓！佢得？！』跟住我又望住佢話『我得？！』跟住我哋兩個一齊話『得咩？！』，Amy仲話『一定得』哈哈！」
陳果狂鬧下成長
小谷當年澳洲大學畢業返港，一心想做幕後，但被經理人Amy帶入行做幕前，她形容是戇居居的情況下拍首部電影《去年煙花特別多》，「拍阿果（陳果）嘅戲，傳統係要做埋幕後，嗰時係造型、化妝乜都冇，要自己做埋，嗰時畀阿果同其他人鬧到反艇，同我幻想嘅情況唔同，直情係電影夢幻滅，嗰時真係好迷茫，個人變到好瘦，好似進入黑洞咁好崩潰。」她最深刻有場戲到大潭水塘拍攝，但製作隊忘記了帶她一齊走，「佢哋走咗，冇人知我仲喺度，落雨成身濕晒，底褲都濕埋，又冇錢喺身，我上咗小巴喺度爆喊，個司機見我咁可憐仲唔收錢。」這些經歷，令她往後日子成長得更快，「嗰時學咗係吸收唔到，但𠵱家回顧返，呢個經驗係好珍貴，係個好好學習，都要多謝阿果，佢係好火爆，見到佢啲作品都係好有火，但佢真係對件事。」
老公背後默默撐
小谷坦承入行多年，依然對自己沒信心，全靠兩個人鼓勵，首先是2010年結婚的丈夫Andrew，「佢真係好支持我，知我冇信心，成日會鼓勵我，我有工作佢就盡量照顧屋企啲嘢，啲女佢湊，盡量唔煩我。」而另一個就是老師黃秋生，「我哋好close，對我嚟講佢係我嘅定海神針，呢1、2年同佢傾完偈，我個人就會好定，好似去黃大仙求一求簽咁。」兩人緣份始於《去年煙花特別多》，「佢見我戇居居叫我跟佢上咗幾日堂，嗰時我係零完全吸收唔到，亦都完全唔知佢講咩，佢講啲嘢係簡單到你唔信，但唔係咁易做到。」就好似拍《爸爸》前，她一樣有請教秋生，「佢一路睇劇本，一路叫我乜都唔好做，我話點乜都唔好做呀？！佢話『總之乜都唔好做，係佢老婆咪佢老婆，生仔咪生仔囉』，但係我做咗咁耐戲，好難去做到無添加。」不過她多得演《爸爸》有秋生和劉青雲教路，「我係好多謝佢，我喺現場亦同青雲傾好多偈，得到兩大影帝加持同埋認可，係鼓舞到不得了。」徒弟獲提名秋生當然開心，「佢好安慰，佢話『幾好呀，見到尾燈呀，哈哈！』佢唔會好誇獎我，但係好緊張件事，我拍緊會message問我，『今日點呀，導演OK唔OK呀誇獎』。」
