有港女日前去沙田車公廟攝太歲，她投訴遭廟內職員兩次誤導，購買了最昂貴的拜神香與及太歲包，她在社交平台出帖申訴，掀起部分網民分享同樣遭遇，該港女批評部分「staff真係勁唔老實」，質疑「咁樣呃啲善信嘅錢好咩？」
華人廟宇委員會回覆《星島頭條》表示，相信由於假日攝太歲人流眾多，職員未能向善信詳細解釋各款產品而引起誤會。司祝已立即訓示售賣處職員必須向善信清楚解釋各款參神產品 / 服務，以供善信自由選擇。本委員會職員亦會就有關事宜加強巡查。
有關港女投訴被職員誤導，她在帖文中詳述自己遭遇，懷疑有人以下列方式出口術誤導善信：
車公廟攝太歲投訴兩遭職員誤導「收貴」 港女拜神揭有人疑向善信「咁樣」出口術：↓↓↓↓
該港女在社交平台Threads發帖，表示在剛過去的周六（8日），與男友去沙田車公廟攝太歲，她表示：「作為一個沙田友，年年都會去車公廟拜神。」
她和男友去到門口，「個攤檔有張紙寫住，拜神嘅香有2種，分別係$60同$90。」她打算和男朋友買一份$60的拜神香共用，「點知個staff講：攝太歲要入大殿，但$60嗰啲香入唔到大殿架，要$90嗰啲先得。」
於是，她為了和男友入大殿攝太歲，兩人買了兩份$90的拜神香，總費用$180。但當她們入到大殿後才發現，該職員的說法疑有誤導，「入到去先發現，只要拎住3枝香，就可以入大殿拜神，根本冇分咩$60定$90，更加冇分咩一人要拎一份。」
事主指無得揀 直接叫我買最貴嗰個
入到大殿要攝太歲包，太歲包是向廟方購買，港女指，職員「話個太歲包一口價$278」，於是她用「payme畀錢，佢（指職員）睇住我過咗$278，就幫我攝」。
完成攝太歲後離開，她發現因為網絡接收不佳，剛才「payme條數過唔到」，她叫家人在本周一（10日）到車公廟再補交一次$278太歲包的款項。
她家人付款時才發現，「原來個太歲包有分3種，分別係：$90、$168同$278。」但是，港女強調：「但我買嗰陣時啲staff冇同我講過，有3個價位嘅套餐可以揀，而係直接叫我買最貴嗰個。」該港女批評部分職員「真係勁唔老實」，「咁樣呃啲善信嘅錢好咩？」
有網民引述投訴後廟方回應：已要求加強職員培訓
帖文引發熱烈迴響，部分網民留言分享相同遭遇，有網民表示，「之前我忍唔住寫過電郵去華人廟宇委員會，投訴同一樣嘢，嗰次我話，唔要咁大份個職員繼續水我，到我堅持佢直頭唔理我……」
該網民將華人廟宇委員會的書面回覆，截圖公開，委員會回覆表示：「本委員會職員就你的意見作出跟進後，已要求司祝必須加強售賣處職員的培訓，並指示售賣處職員了解善信的祈福需要後，再介紹相應的寶燭種類及組合供善信選購。至於廟內財神殿的福袋物件，亦已叮囑司祝必須留意其品質。」
網民：今年成個過程感覺好差
另有網民亦留言分享遇過相同情況：「終於有人寫出來……今年成個過程感覺好差，拜咗幾年車公，啲香越嚟越貴，唔緊要嘅，我當一年一次添吓香油錢，門口已經買咗舊幾水香，入到去攝個太歲，一來又係開我2百幾蚊個價，原本要幫我老公攝埋，咁咪成5舊幾水？」
「我記得之前百零蚊，望一望佢哋個價錢牌，原來有$90太歲衣，我話要$90得喇，個呀姐（指職員）即刻唔理我，點拜點品神，完全無講……」
另外，有網民表示：「佢(指職員)尋日同我講攝太歲$388嘅……連價位都冇講，因為我印象中唔使$388，最後冇畀度錢，拜完就算……」
沙田車公廟年度盈餘1千5百餘萬 位列各廟宇之首
另一位網民則表示：「上星期第一次去車公廟攝太歲……一入門口就問d 職員點拜，因為我需要幫家人一共3位攝太歲，佢地就話要拜車公先攝得，我見寫住$130 一份，就問係咪要買3份先得，咁算啦，一年都係得一次，就買左3份$390，入到去點香先知原來買一份拜車公都ok。」
「之後入去攝太歲，果d 職員係咁sell 我買$168，我明明見到寫住$90一份，問左兩次唔係$90份咩？佢先俾我3份$270， 講真體驗真係有d 差，不過都同自己講算啦，但求安心，但冇諗過有咁多人都有呢個feel。」
沙田車公廟由「華人廟宇委員會」負責管理，該委員會是根據香港法例第153章《華人廟宇條例》，於1928年成立的法定機構，轄下管理的廟宇共24間，委員會主席為民政及青年事務局局長。
根據「華人廟宇委員會」直轄廟宇的收支報告，截至2023年3月31日年度，沙田車公廟年度總收入約1千7百餘萬元，扣除支出後，年度盈餘約1千5百餘萬元，位列各直轄廟宇之首。
華人廟宇委員會回應：人流眾多引起誤會 將加強巡查
華人廟宇委員會回覆《星島頭條》表示，沙田車公廟內有多款參神香燭組合供善信選擇，而設於車公廟外的車公誕市場是由食物環境衞生署營運，亦有提供類似產品，善信可自由選擇。
至於車公廟內太歲殿售賣的攝太歲產品，經與司祝了解，相信由於假日攝太歲人流眾多，職員未能向善信詳細解釋各款產品而引起誤會。司祝已立即訓示售賣處職員必須向善信清楚解釋各款參神產品 / 服務，以供善信自由選擇。本委員會職員亦會就有關事宜加強巡查。
沙田車公廟內提供各款參神產品 / 服務，包括參神香燭組合及攝太歲產品等，相關價目表已張貼於各售賣處。因應你的查詢，相關價目表亦已張貼於車公廟內更多不同的當眼處，以供善信參閱。
同場加映：內地男挑機廟街算命阿姨 睇相竟被怪招「搲銀」 最後結果是…：↓↓↓↓
