成為人妻的黃智雯（Mandy），今年親自布置全盒兼入利是，更分享歡渡農曆年習俗，並且大談離巢後工作感受。婚後的Mandy表示，生B順其自然，更笑謂睇見好姊妹胡杏兒照顧三個小孩的狀況，都係玩下對方的囝囝先。文：鄺芷瑩 圖：林賓尼
25歲至學識用碌油葉沖涼
對於農曆年習俗，Mandy笑言兒時每逢放農曆年假期就會跟着外婆，化身成小助手幫忙布置全盒，又炮製油角及賀年食品。她說：「婆婆唔畀我埋去火爐，我成日整啲乾貨，一係唔做、一係打爛嘢，所以啲玻璃物品唔畀我掂，入下利是安全啲。」Mandy又指外婆家鄉在佛山，較多傳統習俗，並會用碌油葉沖涼，年廿八已為他們準備好，但兒時很好奇如何使用碌油葉沖涼，當時婆婆給予兩塊葉，惟有將塊葉抹下手臂。她說：「當我大個搬出來住，仍然會買碌油葉，朋友問我諗住點沖涼？我話唔知呀！原來係可以將碌油葉包住個花灑去沖，但係到我25歲先知囉！」
談到婚後的她成為詹太，對農曆年傳統習俗可有改變。Mandy笑言甚麼也沒有做，因為兒時跟隨婆婆去做以表示孝義，由於跟老公Anthony（詹文天）比較摩登並非好傳統，就算在家中貼張揮春，都被老公「藐」。她笑說：「最盡每年貼一張揮春，只有一個配額，我咪揀揮春囉！如果擺花的話，佢唔太喜歡好傳統嘅花，而係鍾意日本盆景。」
建立「黃智雯品牌」
離巢後的Mandy，加盟「凱藝娛樂」成為朱茵和蔡少芬的同門師妹。向外闖的她，坦言嘗試很多不同事情，更比喻像讀書時開學的緊張心情，雖然有擔心不適應，但調整期很快，也感到很滿意。她說：「原來都好嚮往選擇自己喜歡嘅事，以前我比較被動，安排咗演劇集，只要專注做好就得，但依家好多事調返轉，我可以主導想咁樣做，變咗參與度高好多。以往幕後參與部份唔需要理會，或者有好多人幫忙，依家雖然有很好的工作團隊，但好多時候個計劃係自己，好想去親力親為，可以去表達自己的意見，嗰樣嘢真係『黃智雯品牌』，對於自己來講係一種挑戰同擴闊眼界。」
早前參演電影《誤判》的Mandy，坦言以前未必有機會接觸電影，向外發展後反而覺得要練好適應能力，因為以前的工作伙伴大多很熟悉，所以好有安全感，但現在要好快去適應新環境。自認性格內斂及有社恐的她表示，近半年自覺最大的轉變是去克服，並以打遊戲機來形容這一階段，就是以全新玩法去試。談到在《誤判》中跟甄子丹合作，Mandy表示跟對方只有很短的一場戲，但足以見證到甄子丹對自己要求很高：「我同佢係法庭戲為主，但對文本或鏡頭會好主導話畀我哋知道點樣做得更加好。我覺得成功藝人好需要精益求精，當去到某一階段，點樣去打破常規，是我要學習嘅，最遺憾自己無份打。（想跟甄子丹對打？）我又唔敢同佢打，(佢)手指尾都按扁我，但觀摩下都好呀！我在戲中係文戲為主，喺戲院睇返部戲，好多場戲都有國際級荷里活水準，最深刻係搭建一比一地鐵車廂實景，我覺得好正，唔好話打，企側邊扮乘客驚慌，睇住佢哋打都好！我都希望可以挑戰拍打戲，有機會梗係想嘗試拍佢嘅動作片，趁自己體力上仲可以。」
重演《薄伽梵歌》
談到新一年展望，Mandy透露將會重演《薄伽梵歌》，拍檔未曾合作過，會有新鮮感：「雖然我有啲經驗，但難度太高，要記好多對白，試過有場戲係望唔到前面觀眾，好似望住個黑洞深淵，講長達十分鐘台詞，因為係翻譯劇，所以唔係日常對話，是有難度。我記得開場前吃飯到換衫去厠所，個嘴都唸緊！嗰場戲對住深淵講，個腦係空白咗！LIVE表演係預計唔到，個心跳到好似跌出來，好在用0.02秒接得返，所以上次每場完結後，都同拍檔朱栢謙講又完一場啦！好似場大仗，今次再重演應該無咁驚堆文字，希望可以跟新拍檔有更新火花。」被問到婚後可否想好似好姊妹胡杏兒一樣生幾個小孩？Mandy坦言隨緣，沒計劃也不會抗拒，又指每年新年都會到胡杏兒家中聚會，見證對方三位囝囝精力如何旺盛：「我見杏兒喺側邊搞到一頭煙，其實我玩佢啲小朋友都OK！」
化妝：諺瞳.小白
髮型：Terrence Chan @HoLA
場地：The House @thehouse_hk
