37歲江若琳（Elanne）去年底推出新歌《一圈》，歌詞講人生匆忙行一圈，探討生命意義。經歷過尖沙咀自炒翻車意外，吉人天相的Elanne更珍惜當下擁有的一切，自爆為爭取陪伴兒子蕭立鈞（Owen）成長，打從出生後都是陪瞓，雖然跟老公蕭唯展（Oscar）分房18個月，但強調冇損夫妻關係，反而越來越好。 採訪：方騫平 攝影：朱偉彥
江若琳相隔7年重返樂壇，繼回歸頭炮作《一直留在心底的事》後，去年底再推出《一圈》，已為人母的Elanne對這首歌好有感受：「呢首歌講生命循環好似一個圈，每個人都會經歷過讀書、結婚，最後會變成老離世。」Elanne尤喜歡歌詞：「叫臨睡覺的小天使來誠心許個願，不心急變大人，要抱著取暖。」正是寫出心聲及主題，她續指應該要珍惜當下所擁有的一切。
用心良苦教兒子獨立
Elanne自爆年半以來都是跟老公分房瞓：「BB出生後，我就作為主要照顧者，兒子喺BB階段容易瞓醒，我怕老公冇精神返工；而家傭姐姐晚上要休息，所以都由我留守喺BB房，𠵱家要培訓歲半囝囝嘅獨立能力，開始一齊瞓子母床，待佢大啲我就會功成身退，正式返回主人房瞓，當然作為媽咪都會有啲矛盾位，一方面想個仔快啲學識獨立；另一廂又會唔捨得，哈！好似我需要佢多過佢需要我咁喎。」
她相信好多父母都會經歷過，為了年幼子女被分房瞓階段：「好彩老公好錫BB，仲係緊張大師，佢明白到小朋友仲細需要照顧，呢段日子都冇詐過型。不過，兩公婆每個月會放下假快閃去旅行，我哋有講唔完嘅話題，大家有心靈交流，加上囝囝成日拖住爸媽隻手，夫妻間比前更加恩愛。」Elanne指結婚7年沒有「7年之癢」：「我哋只係會為啲雞毛蒜皮爭論，未試過大吵大鬧，大家仲係好Sweet。」
