潘靜文（Sherman）、何晉樂（Rock）和黃奕斌（Hugo）對於龍年發展大致滿意，Sherman獲提名「最佳女新人」。展望蛇年，Sherman想孭飛主持遊戲節目之餘，繼續出新歌；Rock望在《愛·回家之開心速遞》有更好發揮，有機會出新歌；Hugo恨推出創作歌及有機會拍劇，演大反差角色。採訪：杜杜 攝影：朱偉彥 髮型:Hugo Poon@PRIVATE i salon(Rock&Hugo) 化妝:King yip@kingsmakeup(Hugo)
Sherman滿意龍年發展，因有機會嘗試不同工作，「都算豐收，挑戰咗3個慈善騷，又主持阿姐（汪明荃）個特輯《荃頌荃盛》，仲做埋奧運主持。」對於不能奪得「最佳女新人」她未太失望，「證明我未夠好，可以再做好啲，同埋工作唔係為攞獎而做好。」蛇年願望，她想孭飛主持節目兼繼續歌手身份，「《聲夢1+2》嗰類遊戲節目，我都有信心1個人主持，而舊年只出咗《傷魚座》1首歌，今年想出返多啲，提醒大家主持外都係歌手。」
希望能雙線發展
龍年發展，Rock最開心有機會加入《愛·回家》演「龍舟」，令他自信心提升，「上年真係好疑惑，入《愛·回家》前會諗我要搵錢定係去追夢，好現實要對父母負責任，加入後有好穩定收入，可以計劃多啲嘢，信心自然大咗。」踏入蛇年，他希望在《愛·回家》可以跟更多不同對手合作，亦會堅持寫歌，「同三太（樊亦敏）夾得好好，但接觸新對手會有啲尷尬，想夾多啲唔同對手令自己快啲成長，音樂方面都有啲歌寫好咗，睇吓今次有冇機會出。」
Hugo坦承龍年因男團「LOONG 9」發展有阻滯曾失望，幸好最終能奪得新城「勁爆 Z世代樂勢力跳唱歌手」，「出道時好夢幻，完成咗細個做idol夢想，工作冇想像中咁多係有點失望，但年尾係滿意，因攞咗新城個獎，最想多謝好似家人一樣嘅fans。」展望蛇年，他最希望唱歌演戲雙線發展，「寫咗首Rap嘅歌送畀媽咪，期望母親節可以出到，另外我都好想有得拍劇，咩角色都冇所謂，最好有機會挑戰啲同自己反差大啲角色。」
