鍾柔美(Yumi)、張馳豪(Aska)為薛家燕、莊子璇、徐文浩等主持的TVB賀年節目《2025風生水起》出任嘉賓，玄學家麥玲玲師傅坦言Yumi冇讀書運，仲會俾渣男呃多次！Yumi強調就算如何艱辛都不會放棄學業；至於剛奪台慶「最佳男新人」的Aska事業也會穩步上揚。 採訪：方騫平
中學畢業時考獲全班第一的Yumi，但到公開試DSE竟然失手，現在只好轉讀HKU副學士。平日Yumi工作完又要追學業坦言有少少壓力，更自爆：「有段時間好崩潰，感覺有啲辛苦，唔知點去平衡學業同工作，最後諗咗一個解決方法，我會盡快完成所有功課，餘下時間好好享受，做最愛嘅唱歌及跳舞，咁樣會舒適啲。」
有望突圍做小天后
麥玲玲師傅直指Yumi沒有什麼讀書運，雖然勤力，但作用不大：「佢讀書表現麻麻，考試多勞少得！」不過，玲玲師傅叮囑她不要灰心氣餒：「不好畀太大壓力自己，每人天份唔同，呢啲係生成㗎，好似我老公唔使點讀書，但由細到大全級考第1，未考過第2，仲冇讀過中7直接跳級入讀港大，呢個世界冇咁完美，有啲人讀書叻啲，有啲人做嘢叻啲，有啲人表演叻啲，Yumi有出嚟做嘢進修運，佢要終身學習，尤其喺表演上的確係幾有天份嘅，所以重點落返演藝上最合適，仲會有機會突破做『樂壇小天后』；而Aska就一步步嚟。」
另外，玲玲師傅又指兩人愛情運未穩定，更狠批Yumi蛇年沖感倩運：「後生女係咁㗎啦，生得靚又多選擇，來來回回會遇到渣男，被呃三五七次好正常，所以專心工作唔使急拍拖，見多啲就會知道自己鍾意乜，享受過程先唔好諗個結果住，就會開心啲，唔好咁早認定。反而Aska好啲，但佢係容易有第3者介入，不過，失戀時候都係靈感泉源，好好享受感覺自然會有好作品。」曾被飛3次的Aska 認同玲玲師傅說法；Yumi則被嚇一嚇後，尷尬地笑說：「我會注意下！」
