又到年晚，小弟各個為食群組例必團年，增進友誼之餘，更互祝來年身體健康。
去邊度食，為一重要的決定。次次如是，全人類皆將這個Happy Problem，大腳傳中畀小弟解決。
都咪話唔大心理負擔，因老友個個以為我去到邊都必定有位有美食，故此冇得輸。其實呢， 過程中真係要猛食食食，大約食十間，才搵到一間水準穩定，出品高質的食肆。
前晚「快樂傳媒老是佛」又開團年飯，當然唔衰得，決定去開業幾年，已兩奪米芝蓮推介的灣仔「船記」。呢間寶號真巴閉，起初在船街開業，中小型，晚晚爆，三幾年已夠膽接下合和中心坐二、三百人的大場。
得唔得？老友，你試 搵晚走去幫襯咪知囉。總之係——冇訂位，冇「船」搭！又係晚晚爆。
以前的TVB高層劉天賜名言——酒家的人氣，就是最佳市場調查，全是真金白銀營造的現實。
好多老友以為我去邊間酒樓都有位，錯晒！例如呢一餐，因要求有房及廚師招牌菜盡出，故一個月前訂才掂。
日子到，酒家門口出現大量望門興嘆客人，不少更是專程由內地來。接待美女要頻頻道歉：「唔好意思，全晚滿座，敬請預訂。」
在飲食業一片淡風中，船記旺成咁，當然冇半點符碌。重中之重為有個一條心的五人團隊，廚房大將軍為呂江紅、楊紹和及鄧百順，拍著樓面兩靈魂張洪青及Shirley。
幾位顯露的拼搏精神，完全唔似純打份工，而十足十當自己的生意咁去拼，究竟點解如此上心？他日再考究 。
是晚又係冇得輸，由厚切蜜汁和哥叉燒打頭陣，食到班「老是佛」個個舔舔 。離場前，難得一一鞠躬向小弟致謝，大滿足也。
