姜皓文（黑哥）、王家晴（Candy）@COLLAR及楊偉倫（阿卵）在殭屍片《邪Mall》首合作，為配合電影要全夜班拍攝，阿卵仲要堅做招魂儀式，當得知工具、經文及燒嘅符全屬真嘢都嚇一嚇，黑哥亦講到好肉緊，「師傅拍完問我哋有冇頭暈？」全場最細的21歲Candy反而最大膽，仲識玩自我安慰，「殭屍同鬼唔同。」勾起兩位前輩停不了的讚賞，先讚勤力後讚拍戲有諗法，新人嚟講非常不得了，搞到Candy完全唔識畀反應，好好笑。採訪：杜杜 攝影：林賓尼 造型:Daniel Cheung&Alyssa Lai(Candy) 髮型:Jove Shek(黑哥)、 Ricky Lam、Heitai(Candy)、 Louis Tse@Number8 Hair Salon(阿卵) 化妝:Manman Fong(黑哥)、Janice Wong(Candy)、Yannis Yip(阿卵) 服裝:LaneCrawford(黑哥)、Sandro(Candy)場地:K11 Art House
黑哥在1998年的亞視劇《我和殭屍有個約會》已接觸殭屍題材，26年後再拍《邪Mall》，雖然冇機會扮殭屍，但就要化特技妝，「去到最尾2日先要特技化妝，算係好舒服，我戥每日要做特技妝嘅演員辛苦，要向佢哋致敬，淨係造型都5、6個鐘。」全片在商場取景，拍攝要通宵進行，黑哥大呼辛苦，「個幾月全夜班，真係幾傷。」阿卵補充：「商場仲運作緊，冇得下午喺度跑嚟跑去又化晒嗰啲妝，哈哈！一定係商場close咗凌晨拍。」
阿卵拍完招魂頭暈暈
拍靈異題材仲要開夜班，大膽Candy唔驚仲要好興奮，「我好鍾意睇呢類題材，有災難性嘅事發生要逃跑嗰啲。」她亦唔擔心會撞鬼，「殭屍同鬼係兩樣嘢，我拍嗰陣係咁諗。」黑哥亦贊同，「殭屍摸到，鬼摸唔到。」黑哥指有師傅在場做顧問較為安心，「師傅有解釋咩係三魂七魄，幾點個時辰要拍嗰場戲，拍完之後又問我哋，有冇頭暈？搞到氣氛好凝重。」
戲中演半桶水風水師的阿卵，本來唔驚鬼，但要堅做法事就另當別論，「有場戲講驅邪，有招魂鈴，師傅叫我背啲經文，教我點燒啲符，師傅話個噹噹、經文都係堅。」阿卵好奇問師傅「咁𠵱家我做嗰啲儀式呢？」答案原來都係堅，「所有嘢都係堅，我咪真係招緊嘢囉，佢話你唔使驚，有咩唔舒服就同我講。」黑哥肉緊表示：「唔使驚，即係會有事啦！師傅又補咗句，啲嘢經過見到儀式就會嚟，見到流咪走囉，即係始終都會嚟喎！」阿卵話做完儀式確實有點頭暈，「我應該因為未食嘢啫！」黑哥笑言：「大家唯有諗呢樣嘢，頭暈暈唔夠瞓啫！」
Candy黑哥一嚟就鬧交
繼處女劇《極度俏郎君》見過一面後，首部電影再遇黑哥，兼飾演父女，Candy覺得好有緣。黑哥就大讚「乖女」表現，「Candy好勤力，我哋全夜班都幾攰，但佢都幾生猛，周圍去探索吓去了解，呢個不得了。」戲中兩父女有不少衝突戲，Candy最初好緊張，「我同黑哥第1場戲就係鬧交，一嚟就拍鬧交好緊張，但黑哥好好人，拍之前會同我傾吓偈，好快就冇咗嗰種緊張或者怯。」
Candy跟首合作的阿卵沒有距離感，「第1次對戲，講佢幫緊人睇相，嗰場戲比較搞笑，我觀察佢同導演點樣溝通，會加啲自己創作入去，令角色或者場戲更加好，令我覺得好安心，第1次合作唔會有壓力，可以心無雜念咁去拍戲。」阿卵對Candy亦高度評價，「佢好認真對待呢個工作，冇停過諗點樣可以做好場戲，feel到佢有啲諗法想自己去摸索，去到真係唔知點做先會問，佢會想試吓先，呢樣嘢係好，如果一嚟就問人點做，對一個演員嚟講冇咁好。」黑哥亦加把口，「通常新人一張白紙，叫佢做乜就做乜，佢唔係，會問清楚點解要做，咁做係咪會好啲，有自己諗法，梗係好事啦！」面對前輩們狂讚，Candy完全唔識畀反應：「受寵若驚！」再尷尬說：「多謝！我會繼續努力！」非常可愛。
3人合作好開心，希望再拍《邪Mall》續集或其他題材，Candy就提議，「拍運動題材，拍長跑，我知黑哥有跑步。」阿卵搶住話唔做運動員，Candy就安排阿卵做教練，黑哥即投訴：「點睇我都係教練！」阿卵反駁他，「你係做當打嘅運動員。」Candy就覺得自己可以做經理人，阿卵及黑哥就相當不滿，指她提議運動題材，自己唔做運動，「叫啲老人家去跑！」Candy唯有傻笑打圓場。
