電影勇奪本屆康城影展最高榮譽金棕櫚大獎，亦是近年最易入口的金棕櫚。電影風格跟導演Sean Baker過去作品有好多相同之處，主角同樣是社會邊緣人。片長140分鐘，前半段含大量有味糖衣，鹹鹹黐黐，屬超三級色慾童話，中後段變警世爆笑公路片，所有角色都好唔正常，一套戲玩幾味，最初你以為係一套愛情電影，睇睇吓大暴走，最後發現原來係一套悲劇。女主角Mikey Madison做得超好，難怪被睇好入圍角逐奧斯卡影后。(剛上映) 撰文:廖思慧
導演前作《跨性有話兒》講述跨性別人士的故事，而《赤色大箭男》主角是鹹片男優，至於《歡迎光臨夢幻樂園》主角是脫衣舞孃，加上《阿諾拉》的女主角亦是脫衣舞孃。美國獨立導演Sean Baker以關懷邊緣社會聞名，佢一直為被忽視群體發聲的初心從來不變，真心Respect。
又鹹又趣悲傷童話
睇預告以為脫衣舞孃只係信錯有錢仔被呃感情，原來導演玩到咁鬼癲。故事重心係俄仔廢柴富二代Ivan (Mark Eidelshtein飾)搭上美國天真脫衣舞孃Ani(Mikey Madison飾)，因為Ani識俄文有幸服侍到貴賓Ivan，由高薪包一晚變包一周，男的「Have fun!」女的雖然在夜場工作，但仍然天真無邪，Fun之餘都想有愛情正式脫貧。
有錢仔有乜所謂，即飛去拉斯維加斯結婚，Ani變身Ivan嫂幾日咁多，童話迅速瓦解。電影前半段又鹹又趣，Ani唔著衫多過著衫，不過最過癮是所有性愛場口都冇乜挑逗性，可能如俄版timothee chalamet的Mark太𡃁仔，似教學多過真心歡愉。之後俄仔監護人及兩名大隻保鑣入侵豪宅，觀眾終於等到全片第一個爆發點，群戲勁精彩，每個演員都好癲。之後Ani、監護人加兩個保鑣由對立變同路人，齊踏上搵Ivan之路，變公路片之後風格大逆轉，好喪又好笑，完全估佢唔到。再讚Mikey將天真貪錢女的意氣風發，到慘被拋棄的心路歷程演繹得實在太好，前途必定一片光明。
