高海寧（高Ling）日前參與保健品品牌的開幕儀式。剛放完一個月假連去3個地方旅行的高Ling，心情大靚，穿上米白色超貼身連身裙現身，盡顯fit爆健美身材。高Ling剛投入TVB新劇《飛行日誌2》拍攝，她坦承雖然平日工作忙碌，連運動時間亦買少見少，但近年反而越來越fit。
突破自己有滿足感
高Ling認為其中一個令自己保持容光煥發的秘訣，就是去旅行，但直言正在事業搏殺期，這個方法十分奢侈，「我𠵱家最缺就係時間，咁啱個劇延遲咗開工，公司好好見到有個空檔，就畀我放個假放鬆吓，始終之前工作壓力比較大，於是我就去咗滑雪，又去峇里島做瑜珈，再去咗轉南法。」原來南法之旅是高Ling人生首度獨自出遊，「我冇諗過我會做得到呢件事，一路都缺乏呢個勇氣，我連食飯都好少一個人，自己一個人去旅行得唔得㗎？今次我係突破到自己，原來只要你想做就得，成功咗之後係好有滿足感。」
認識新朋友
談起南法之旅，高Ling勁興奮，提到在社交平台貼出跟法國男仔合照，她即笑言：「你講個BB呀！哈哈！」本身愛親近小朋友的高Ling，此行除了跟小朋友傾偈合照外，還認識了佷多新朋友，她覺得一個人旅行，可以放空自己，想通不少問題，「喺其他人身上可以睇到有其他嘅生活方法，其實生活係有得選擇，呢個都係今次旅程另一個得着。」
未能接受Long D
至於此行有否艷遇？高Ling坦言：「其實我都好恨今次有艷遇，可惜冇發生到，都唔知點解。」她還表明不介意談異國戀愛，「我當然唔介意啦！緣份安排到係好樂意！生個混血BB都幾好！」不過要遠距離戀愛（Long D），她則未能接受，「因為我工作好忙，見面時間已經好少，如果仲要Long D嘅話，我會唔識得點樣去維繫感情。」高Ling認為工作忙是常態，要製造艷遇機會並不容易，預計下次放假去旅行已經要等到下年，「如果到時真係得閒嘅話，我會join蘇師傅（蘇民峰）去滑雪，因為佢每年新年期間都去北海道滑雪，佢話北海道嘅雪係最靚。」
