50歲商台DJ泰山控訴遭蘇施黃（阿蘇，原名劉高琮)）職場欺凌8年，成為城中熱話，連帶當年蘇施黃用雪糕掟小販等舊片也翻熱，掀起全城聲討。面對海量負評，激罕受訪的「大魔頭」蘇施黃，接受《星島頭條》獨家訪問中首度開腔回應，堅持不會道歉，更反指係泰山做得不好！她自認惡爆兼乞人憎但百毒不侵，更以娛樂圈生存法則捍衛強硬作風。 文：娛樂組
泰山披露遭蘇施黃職場欺凌8年
50歲的商台DJ泰山（曾匡民）早前自爆患前列腺癌第四期，近日在網台節目再講當年跟蘇施黃入行經歷，披露慘遭對方職場欺凌8年，試過被兜口兜面掟筆彈稿，直指被鬧到「無自尊，冇咗自己，喪屍咁樣去做」。雖然承認受極端訓練而鍛煉出耐性及高EQ，但坦言：「唔開心多過開心」。
相關閱讀：蘇施黃再被爆霸道惡行！再有前商台DJ爆料曾失控扔鉸剪 強制熄咪禁持相反意見
昔日手足爆蘇施黃「惡行」
除了泰山事件外，網民亦瘋狂重溫蘇施黃昔日的爭議片段，包括她在節目《蘇GOOD》中嫌雪糕貴而怒掟小販、到燒味檔逐樣彈等；另有前商台DJ Tristan（黎榮業）在網台節目《娛樂好好玩》中爆料，指「太后」曾失控扔鉸剪兼強制熄咪去打壓反對意見，引來網民狂轟蘇施黃「冇禮貌」、「乞人憎」、「極不尊重」。
相關閱讀：蘇施黃嫌雪糕貴掟小販片段翻HIT兼瘋傳 IG留言辣慶網民：根本就冇料到
蘇施黃：鬧咗8年都唔走，傻到不得了
面對海量負評，70歲的蘇施黃接受《星島頭條》獨家訪問時講笑自嘲：「我根本係咁惡吖嘛！」對於被指唔止「惡」，兼非常「乞人憎」，蘇施黃卻豁出去笑說：「『惡』同『乞人憎』兩句說話都係差唔多啫，冇乜分別呀？」講到泰山對她仍耿耿於懷，阿蘇反擊：「如果俾人鬧咗8年都唔走，PA人工又唔高，咁佢都傻到不得了啦！不過，我哋依家有傾有講嘅。佢都有同我講話做咗訪問，有多謝及稱讚我畀機會佢，都OK呀，有乜所謂呀？大家都幾十歲。（但佢彈多過讚喎）嘩！我入行近半個世紀，已練到百毒不侵，如果我睇到負評仲會唔開心，都唔好撈呢行啦！」她更帶笑強調：「總之係其他人嘅interpretation（解釋），唔係我見解，我一啲都唔介懷。」
相關閱讀：商台Dj泰山跟蘇施黃搵食被鬧足八年打散自尊：搵支筆車埋我度 阿蘇回應指控：仍然係大魔頭
蘇施黃強調娛圈唔係人人做得
此外，蘇施黃還講解職場常態：「上下級關係，少之又少係啱，若果對方幾十年都消化唔到，我都幫佢唔到喎。」被問到是否欠泰山一個道歉？蘇施黃即驚訝笑住反擊：「道歉？唔係嘛！當日係佢做得唔好我先窒佢，點解要我道歉？大家有冇搞錯嘢？個世界係咪神經㗎？」她又以娛樂圈哲學解釋來捍衛強硬作風：「呢個圈要快、要醒、有性格，唔係人人做得嚟，所以想入娛樂圈唔係人咁品，唔好用打工仔心態去睇娛樂圈。所以出面打工仔嘅Comment對我一啲影響都冇，佢都唔知娛樂圈嘅世界係幾難去生存！」至於泰山在娛樂圈是否合格？蘇施黃沒有評論，淡然表示：「成績表應該係大家畀佢的。」
