從小到老，我都好怕人長氣，講完一次又一次，提完一次又一次，煩都煩死。不過，一年一度，小弟必須扮演「長氣人」，向認識的所有「非富豪」老友，（富豪一定唔吼，覺得細眉細眼），不厭其煩提佢哋，記住申請銀髮債券。
十個退休打工族 七個唔識理財
對，我好肉緊，因親眼見到十個退休打工族，有七個完全唔識理財，自己胡亂踩入股市變水魚，又或，被如恒河沙數的各式騙子騙去「棺材本」，呼救無門。社會上人種五花八門，各有自己目標，騙子的目標就是呃你的錢，呃到，就是成功。
其他守法的人又如何？是先保住財富，再在安全情況下增值。
令自己在安全理財立於不敗之地，是個很大的學問，你不會與生俱來就識，因金錢世界實在太險惡，「道」經常不及「魔」高。尤其人有負面人性，包括貪婪，十個中有八個敵不過這心魔，而八個能敵的，則有一半是對投資無知，結果大部分人重傷。
市民咁易俾人呃，靠邊個保護？第一當然是自己，若你貪心，你無知，就極易自投羅網變水魚；第二才到政府，即各部門，包括警方及證監會等等。
當然，整個政府也有責任令市民保存老本，但牛唔飲水唔撳得牛頭低，市民也要肯接受「保護」才成。因為，錢係你嘅，政府絕不可替你出主意，能做的，就是設計各式各樣安全設施，替你保住財富。若你不接受，就唯有祝你好運了。當然，若你自己選擇「唔好運」而輸光所有金錢，社會亦不會睇住你死的，總有各種援助措施維持你生存。但由明明有財富而淪落到靠政府救濟，是你理財或投資的目標嗎？
「銀債2025」今日最後申請
今日，我再次大大聲提本欄老友記，「銀債2025」今日最後申請喇，咪錯過，咪放棄呀。呢個世界，只有一樣「金融產品」零風險又可跑贏通脹的，記住，此乃60歲以上香港人的特權，後生仔冇得享受㗎。
再長遠點，你應考慮埋香港年金、安老按揭及保單逆按揭。上咗年紀，財富安全重於一切，千祈咪冒險呀。
資深傳媒人 曾智華
