(曾智華)
嘩嘩，今日標題是否很吸引？你一定會問睇乜表演？又或睇邊個表演？
正是睇新上任的中文大學協理副校長（傳訊及公共關係）曾幗屏表演呀！
中大早前公布曾小姐的背景，相當強勁，由讀中大政治行政系開始，之後分別在媒體、政府及國際非牟利機構及企業等任要職，實力雄厚，經驗豐富。
但少少唔明，小弟江湖關係可能仍相當淺，竟然從未聽過曾幗屏名字，當然更不認識。但更奇是，我認識的幾乎所有傳媒「老是佛」（全部在各類傳媒工作半個世紀），也似乎冇一個曾與曾小姐共事或交手，反而佢爸爸曾景安就大家都認識。 正因大家對曾小姐毫無印象而突然空降「多事」的中大，當然人人都想睇佢會點樣協助中大重新建立形象。
大家一定記得年多前，香港兩所頂級大學香港大學及中文大學，幾乎同時出現頂層內鬥，校董會主席與校長「狗咬狗骨」勢不兩立，搞到日日見報。作為全球極具學術地位的著名學府，真係睇到香港人眼都凸，無不搖頭嘆息。
咁麻鬼煩，最終特首出馬撲火。香港大學先換掉校委會主席，由著名銀行家王冬勝走馬上任，話都冇咁快，即時一切平息（表面？），事事暢順，壞消息再聽不到了。
中大又如何？雖然換\u5497校長，由「準諾貝爾獎」大熱盧煜明坐上，初時大家以為應該掂啦，點知唔係，真的樹欲靜而風不息，反而「戲劇性」連走兩個高層陳維安及張宏艷，關係斷得非常決絕，毫無禮貌性鋪排，睇到圈內人擘大口。再加上「張宇人事件」的震盪，近日中大明顯仍處多事之秋。
如此情況下，曾幗屏空降，有點虎山行味道。想當然應該身懷絕技，且看怎樣擺平局面了。
