現年28歲的張天賦（MC）出道短短4年，火速爆紅，至今產量極高更一直密密出碟，早前他推出全新個人大碟《Sweet & Sour》，8月19日更假旺角麥花臣場館舉行《A sweet & sour night》的新碟發布音樂會。MC日前接受《名人雜誌》訪問，除逐一解構新碟歌曲，更搞笑自爆曾以為激嬲同屬華納唱片的湯令山 ，並大派福利劇透明年紅館開騷，各位樂迷又要準備撲飛了！撰文：娛樂組 攝影：譚志光
「咕嚕肉」比喻新碟概念
新專輯收錄MC 10首作品，當中有多首大熱歌曲包括《小心碰頭》、《說謊者》、及《懷疑人生》等等，更收錄了國語新歌《目擊者》、《狼狽》及首次推出英文新歌《Ain’t No Foo》及《I’m okay》。一向為食的MC以「咕嚕肉」這道菜餚來比喻新碟的主題概念，他表示因為這張碟中西合璧，英倫風及中國風兼備，帶點優雅同時又有點「哋」，雅俗共賞，加上這道菜式在高級酒店或者大排檔都會食到，所以他覺得咕嚕肉非常切合這個專輯的概念。
人生最好籌碼是「冇籌碼」
問到吃過最好食的咕嚕肉？MC笑言自己對食物要求並不高，只覺得有多啲菠蘿就可以，因為他喜歡吃菠蘿。而MC在這張專輯亦有參與創作部分，他表示要在個人特色及大眾口味取得平衡並非易事，「音樂無分高低，任何種類嘅歌都可以成為流行曲，但最難係當我唱一啲大眾未必鍾意嘅曲風，必須要中間攞個平衡，加返大家會喜歡嘅元素。」其中新歌《百萬大道》講述以青春去作籌碼，MC認為人生最好嘅籌碼就是沒有籌碼，「因為你冇嘢要怕輸，同我音樂路上係幾相似，我一路盲衝衝冇理後果，可能畀我嚟多次的話，未必係同樣嘅結果。」
《記憶棉》的Daddy
至於歌曲《目擊者》，MC透露這首歌原本作曲人打算留來給自己用，「聽完demo之後，我極力要求公司同事，你求佢畀我啦，因為我真係好喜歡呢首歌，亦都好喜歡呢份詞。」他續笑言：「我會形容呢首歌為《記憶棉》嘅daddy，因為當初呢首歌我哋攞唔到返嚟，於是公司同事畀咗呢首歌徐浩做reference，叫徐浩寫一首類似嘅歌，所以先出現咗《記憶棉》。」
當年MC憑着《記憶棉》一曲火速爆紅，他憶起錄製過程，坦言這首歌是他入行以來最難唱的歌曲，「一來佢有兩次升Key位，真音假音咩都用晒，呢個亦都係我同徐浩錄音錄得最多session嘅一首歌 ，好似佢唔走音已經係一個好困難嘅地方。」他更認為很多時錄音studio的版本未必是最好，但必定是最穩陣的版本，若要有火花只能在live show才會出現。
初嚐填詞感困難
MC首次推出英文新歌《Ain’t No Foo》及《I’m okay》，原來《I’m okay》是由MC親自操刀作曲填詞，他自爆是在錄音室邊錄音邊寫，「其實作嘅過程非常之快，大概5分鐘已經寫完，但係填詞因為我文采唔係非常好，有好多字句需要郁動我都唔係好識，於是喺錄音室搞咗幾個鐘，大家傾吓用詞應該要表達咩意思，跟住先錄。」首次親自包辦曲詞， MC形容為小試牛刀：「其實填詞真係好難，覺得好有限制，我未能夠做到將佢濃縮成為一個我想講嘅故事，今次叫做小試牛刀，英文詞我覺得已經相對容易，所以如果要填廣東話或者國語嘅詞，我需要一位老師帶住我。」
他續指《I’m okay》是屬band仔歌，最初稿更有粗口成分，後來他以電影一個小丑角色的角度去填詞，他笑言總算表達到意思，但認為未夠好。原來私下的MC都有小丑的陰暗面：「每個人都有陰暗面，陰暗面係用來平衡bright side，人冇可能剩係得bright side，所以必須要容許自己有呢啲情緒，釋放負能量，而喺過程之中，你要承認或改變自己。」
自認會講善意大話
提到《說謊者》主要講及欺騙當下的感情，MC更大方承認自己會講大話：「一定有，其實我覺得感情、愛情或日常生活中，大話係不可缺少，而我自己就好少講惡意嘅謊言，惡意嘅謊言都只係用嚟呃自己。（接唔接受到別人善意嘅謊言？）我唔得㗎！我寧願坦白咁講，我會唔開心一場，都好過我知道畀人呃咗，呢個唔開心會維持好耐。」
誤以為激嬲湯令山
歌曲《一百個未老先衰的方法》就請來樂壇新貴湯令山操刀作曲，雖然二人並非第一次合作，但亦有不少火花，MC更自爆曾經以為自己激嬲湯令山，「湯令山本身係一個好cool嘅人，甚至之前喺公司，我一度懷疑佢係嬲咗我，後來知道純粹因為佢嘅溝通方式比較唔同。有次我真係專登走過去問佢，『你係咪嬲咗我？』佢話唔係啊，冇！」他更大讚湯令山非常有音樂才華及獨特想法，並預告跟對方會有其他合作。
重啟密集式工作表
最近，MC重啟密集式的工作時間表，他表示：「嚟緊幾個月都好忙，因為每個月都有唔同嘅show，但反而開心，嗰強度我覺得尚算應付得到，同埋我覺得係一個渠道，提醒自己要身形管理一下，依家開始咗，我好有信心可以做到嘅。」並坦言早前8月19日舉行的新碟發布音樂會是一個好好的經驗，反應好好，難有機會將所有歌都Live唱一次給觀眾聽，又坦言好耐未在香港開演唱會，今次是很好的見面機會。最後，MC來個大劇透，預告明年會在香港開演唱會：「下年我估，好大機會喺香港開show……我估會係喺開過嘅場館！」估計MC所指的正是紅館。
