敢言的鄧兆尊一度因爆出「劈腿6富豪」的女星而引發話題，之前他和七師傅接受了李婉華的訪問，期間，鄧兆尊再次爆出猛料，揭示某些選美活動背後不為人知的潛規則。他驚爆多年前為亞姐選美做嘉賓時，完賽後竟有職員遞上附有價目的佳麗簡介表，大家聽就聽得多，但由兆尊講述所見所聞，勁精彩！ 採訪：娛樂組 攝影：Benny 場地：牛品台式火鍋（香港）
當日李婉華訪問了鄧兆尊和七師傅，七師傅話當年，爆出和兆尊有淵源：「我覺得佢係好男人，雖然好似古時皇帝一樣，只想有新鮮感，唔會掂後宮三千妃嬪，所以當年咪諗住介紹啲港姐靚女畀佢認識，等佢可以百花齊放囉，點知惹怒『把關』嘅3太（G奶陳小姐）！」兆尊卻澄清3太只係講笑冇嬲豬。
拒談繼子女財產分配
雖然3太育有2子女，但兆尊表示接受做繼父，兩位太太甚至會幫手管教：「我哋相處融洽，佢稱呼我乜都得，鍾意叫我爹哋我都唔會介意。」多了子女後，問到關於財產分配時？兆尊醒目避談：「將來嘅嘢冇人會知，呢啲完全係投機性嘅嘢（有冇寫定平安紙？）你（記者）做我條女先話你聽啦，呢啲係國家私隱唔可以爆，安全性問題唔答得，而且就算有平安紙都可以隨時改變，咪傻啦。」
三高受唔起獸性刺激
在旁的七師傅笑指兆尊的太太們已到「狼虎之年」，應付3位中女太太不容易。兆尊卻說：「我嘅慾望唔太大，暫時個個都安守本分，OK呀，搵啲少女咪仲煩。」此刻七師傅竟獻計：「個個都要排期陪瞓，嘥大家精神，不如同3位太太一齊玩多人運動啦！」鄧兆尊聞言耍手擰頭，聲稱從冇玩過：「唔好諗呢啲啦！一隻羔羊掉咗落個獅籠入面經已冇喇，更何況畀3隻圍就渣都冇！」他再笑住補充：「咁樣做只會刺激到獸性，我有3高，唔好咁刺激。」七師傅讚揚兆尊夠專一，即使身邊的女人老了都不會「棄養」。對此，兆尊解釋說：「我對住佢哋唔會厭嘅，因為佢哋全部都係我控制範圍，唔會有惡妻，而且我受唔起衝擊，一沖就散㗎喇，更加冇資格做花花公子，其實我嘅家境只屬中上，邊個話我有十幾億呀？精子都冇啦。」
贊成體驗社會光暗面
被誤為「好色」的鄧兆尊又再爆料：「10多年前離開TVB後，曾以嘉賓身份到現場睇亞姐競選，選完後竟有幕後人員送上佳麗簡介，裏面有7至8個選手註明銀碼。」兆尊認為這些潛規則都是為了「搵食」而存在，但最奇怪和他完全扯不上關係：「我只係被邀請做參觀嘉賓，點解要畀我睇價目表呢？哈！真係一個笑話嚟。」當時兆尊已有兩位太太，故覺得係陷阱，冇半點動搖及興趣，於是睇過就算：「我對呢方面冇乜興趣，自己本身都好開心。」既然有潛規則，被問到是否仍會贊成女孩子參加選美？58歲兆尊睇得好通透，他拆解說：「每個人有揀選自己賽道嘅權利，至於賽道上點樣跑、點樣贏、點樣失敗、點樣跌倒，係我哋自己決定嘅嘢，我會鼓勵人哋去體驗唔同嘅社會光暗面，越後生體驗受傷害會越少，坦白講，唔止係選美，即使一間公司嘅小秘書，隨時都可以畀人包養啦，喺社會上每個崗位及職業都會有呢啲嘢發生緊，只不過喺娛樂圈比較敏感及容易發生啲。既然咁，睇下你選擇行邊個方向，要揀得嗰個條賽道就要小心啲保障自己。」
另外，沙姐明（林建明）爆當年李婉華拍亞視劇《香港一家人》時同林韋辰有拗撬，婉華卻否認：「冇唔開心，可能太緊張對方表現，大聲唔等如係嗌交。」不過，她坦言兩人好耐冇聯絡。
