ERROR成員梁業（肥仔）、COLLAR隊長沈貞巧（Gao）、楊安妮及最後五強Dance Crew等今日（3日）為節目《Dance X Crew – Hong Kong Stage》決賽進行錄影，肥仔指因節目中存在很多變數，故很難有心水，由於大家的水平都很高，所以很難講誰會贏，只希望今日是好睇的賽事。
Gao為10月舞台劇作準備
提到今次特別邀請了來自日本、曾參加2024巴黎奧運會男子霹靂舞項目獲得第四名的半井重幸與他的跳舞組合「XII After Ours」來演出，問肥仔會否也想趁機交流，他笑指是「女士們自肥」，因覺得他們很靚仔：「我同Tsoul（田曜誠）要行埋一邊，當然我哋顏值都唔係好高，所以要盛裝出席。」肥仔將在8月中演出舞台劇，他指現時早上排舞台劇，而晚上則排舞，很充實，至於COLLAR在本月底開騷之餘，Gao亦要準備10月的舞台劇，她指自己和團隊均有各方面的練習，這個節目完結後自己就會專心：「好多嘢學到，呢排都幾充實，不過舞台劇嗰邊未正式排練，而家都係學嘢狀態，吸收大家經驗同方法，（睇咗劇本？）睇咗，不過唔會劇透。」
大讚保錡堅大隻
對於早前COLLAR另一成員Candy（王家晴）指希望出Solo歌或跟Gao出合唱歌，Gao表示自己也想，覺得無論是和Candy或Ivy合作也是頗特別的火花，因為事前應沒人想過，不過今年工作較忙，所以應不能出單曲，也因許軼出新歌，故將焦點集中在她身上，肥仔笑指那是公司策略，沒有可能推兩個人來爭新人，又問Gao到時是否要MV男主角，之後更推薦Tsoul，問到會否推薦隊友保錡？肥仔指對方現在頗開朗，換了新髮型後幾清爽和精神：「講真佢騷手臂堅大隻，（之前你哋去school tour！）希望可以繼續，我哋想繼續打年輕市場，我都開始變阿叔，我係咁諗，以前細細個聽陳奕迅，大個咗我哋會繼續聽，佢開演唱會我哋會去睇，希望到時班小朋友大個咗會嚟睇我哋演唱會，我哋目光放得好遠。」
