(曾智華)
無線電視主席許濤，真係要錫晒方東昇及其《猜情尋》團隊 ，因就算花上千萬金元搞TVB形象，都肯定唔及一個《真相猜．情．尋》系列。
《猜情尋》令我諗起多年前的《鏗鏘集》（唔好搞錯，聲明係多年前），在香港電台電視部內，簡直是天之驕子節目，要人有人，要錢有錢，要Crew有Crew，拍幾耐？基本冇問題，奇在不會受到其他組別同事呷醋及眼紅。
點解？因《鏗鏘集》乃電視部以至整個香港電台的招牌，海外得獎無數，集集嘔心瀝血，必須慢工出細貨，人人理解又明白。
呢種情況，相信也發生在TVB的方東昇身上。冇人會逼佢，冇人會眼紅佢，只會羨慕及欣賞佢。點解？次次交出不一樣的招牌級製作，絕無行貨，省到無線新聞資訊組招牌光閃閃。
一切冇符碌，小弟算行家，一睇佢個《真相猜．情．尋》，已知是個極度痛苦製作，因要翻查幾十年內幾百種資料，要求N咁多相關人士出鏡（不少已逝世，去邊搵？），呢類節目，你問十個在世相關人士，肯定九個耍手擰頭，因可能真的唔知，也可能知都唔能夠講或唔想講。
幸而畀佢 搵到一個最後搶救李小龍的麥海雄醫生，佢肯講，立即拉出好多條線。節目內冇講明的，等小弟推斷啦。
第一，鄒文懷為保護李小龍（佢獨家搖錢樹），前言不對後語，舊片段所見，的確高手，講「不真」的說話，樣貌仍然百分百誠懇。
第二，李小龍太太蓮達及第一位負責搶救的醫生朱博懷，肯定知道李小龍逝世前的身體狀況，以及乜原因導致佢猝死。故此，才會在麥海雄醫生正式宣布李小龍死亡時，反應不尋常地平靜。
方東昇繼續努力！
