陳蕾自嘲愛認叻輸唔起 新歌剖白脆弱 拒搵前度訴苦丨名人雜誌

陳蕾最近推出新歌《求救的勇氣》，靈感來自於自身經驗，講述向別人求救是一件需要勇氣的事，而新歌找來前度Mike Orange合作，是二人分手兩年後再度攜手，陳蕾透露二人「再見亦是朋友」，她更用了三個負面的詞語來形容自己「認叻、輸唔起、發爛渣」。文：娛樂組 圖：朱偉彥 

陳蕾的新歌靈感來自於好友的情緒困擾。

陳蕾由打機少女到創作爆發，自認是創造力最強的一年。

陳蕾透露新歌的契機來自一位移民了的好友，原來對方早前一直受情緒困擾，但卻要精挑細選一個合適的時機才跟她說：「佢覺得人生冇晒意義，唔知點解要活着，聽到個吓我好驚訝，因為覺得我同佢相隔咁遠，又唔係同一個生活圈子，以為佢同我講佢嘅情緒應該會易啲開口，後期發覺佢因為覺得我工作好忙，怕打擾到我，令我發現原來咁熟嘅朋友，都要選擇一個求救嘅時機，甚至係求救嘅勇氣，令到我有呢個啟發想寫首咁樣嘅歌。」

一直被封「樂壇社工」，究竟陳蕾是否一位好的安慰者？她直言希望可以好好陪伴身邊的朋友，雖然自己屬「報喜不報憂」型，但如果必要的時候，亦擁有求救的勇氣：「我發現我有呢個勇氣，要多謝身邊嘅朋友，佢哋令我覺得我有足夠安全感，信任度，令我夠膽同佢哋分享我嘅脆弱，難過失落，同時提醒自己，希望可以成為一個好嘅聆聽者。」陳蕾自爆小時候事事都搵朋友訴苦，現在卻偏向自己先處理後再找朋友分享。

陳蕾新歌《求救的勇氣》剖白脆弱，講述向別人求救亦需要勇氣。

陳蕾與MC張天賦（左）、洪嘉豪（右）獲封華納三寶，經常有合作。

同前度「再見亦是朋友」

陳蕾與前度Mike Orange 分手兩年後首次合作新歌，她自言感覺有趣，「可能係溝通上，會唔會有啲嘢係唔夠膽去表達呢？呢首歌係好好嘅嘗試。而嚟緊希望陸續同更多唔同嘅人合作，但要視乎歌曲適唔適合，當然Mike係一個好好嘅選擇，唔排除繼續會有合作。」問到她與Mike Orange 是否「再見亦是朋友」，不開心時會否找對方傾訴？陳蕾大方透露：「可能初頭都會多啲，我哋以前嘅溝通係好緊密，分開咗好一段時間，確實身份上就算自己有需要搵朋友傾訴，都唔應該第一個要諗起佢，當然我唔係覺得佢冇拆解我煩惱嘅能力，係要尊重返𠵱家嘅關係。」

陳蕾與Mike Orange分手兩年，今次再度合作創作新歌。

早前和周殷廷在KKBOX上的演出都好精彩。

陳蕾闖蕩樂壇多年，攞過不少大小獎項。

耍手擰頭拒做演員

談到在新歌MV中，陳蕾喊得到位，問到會否考慮做演員？她即耍手擰頭表示：「我發覺好攰，嗰日嗌cut 真係鬆一口氣，全日好壓抑情緒，唔俾自己開心，平時我做嘢係周圍撩人傾偈，但拍MV嗰日就係唔講得，break都冇人夠膽嚟同我講嘢，因為驚打擾到我情緒，同埋我係即使要向人訴苦，都會加入好多自嘲，唔鍾意成個環境太悲傷，鍾意歡笑多啲，所以呢個MV對於我嚟講係，希望淨係得一次。」

陳蕾在新歌MV中喊得好入戲。

「樂壇社工」陳蕾拒做演員，全因「喊戲太攰」。

搵彭秀慧幫手催淚

新歌MV找來彭秀慧擔任導演，原來陳蕾是對方的學生，2017年曾報讀彭秀慧老師的演技班，當知道MV要挑戰喊戲，陳蕾擔心自己沒有能力去喊，所以找來彭秀慧幫手：「事前專登約佢食飯交流，去到拍攝當日我聽到彭秀慧老師分享咗佢自己一個故事，係好感動，我真係喊，佢都有喊，我即刻自責『陳蕾你好殘忍』，因為你喊唔出，搞到彭秀慧要將自己嘅難過再講一次。」她更謂喊不出來，不是沒有難過的事，而是她懂得怎樣梳理自己的情緒，當遇到失落時，陳蕾會什麼都不做，躺平在家的沙發上瘋狂打機去調整心態，等待兩三天後再有動力就move on。

陳蕾早前為電影《看我今天怎麽說》演唱主題曲《What If》，更親自上陣以手語拍MV。

陳蕾新歌MV搵彭秀慧操刀，更被對方分享的故事感動到喊。

創造力最強一年

今年初，陳蕾誇下海口可以出20首歌，她坦言進度良好，總算是講得出做得到，而向來熱愛打機的她笑言最近出新game，都非常有節制：「連續打咗三日啫，跟住真係冇打，因為呢排好多嘢想寫，我新創作倉庫裏面真係有20首歌，有啲寫俾人，加上我今年目標係想出一隻碟，今年可能係我產量最高、創造力最強嘅一年，個量多到係我已經諗埋下下一隻碟想講咩。」她笑言想藉此讓公司知道她不只是在打機的。

「牛奶」竟是童年陰影

陳蕾出道以來向來行「cool爆型格」路線，但私下其實率真幽默，如果要她用三個詞語來形容自己，她笑言是「認叻、輸唔起、發爛渣」，並謂：「打機方面最鍾意未玩過嘅嘢認叻先，所以我啲朋友好鍾意睇我輸，俾啲挫敗感我呢個咁認叻嘅人。」提到人生最怕的事，陳蕾續自爆鮮為人知的秘密，原來她最驚「牛奶」：「係童年陰影，我係驚牛奶，可能掂到隻手都唔得，要瘋狂洗手，聞到牛奶會想反胃。細個我好鍾意飲牛奶，飲到四歲都戒唔到奶粉，日日都瘋狂咁飲，可能飲得太多，飲到有次嘔出嚟，個種牛奶味從此我就物極必反，驚咗所有關於牛奶嘅嘢，包括豆漿，杏仁糊都唔得，望落覺得好似牛奶，但明明佢唔係牛奶味，我都覺得好驚。」

雖然陳蕾一路行緊「cool爆型格」路線，但私下其實率真幽默。

陳蕾去年攜手洪嘉豪（右）、魏浚笙（左）演出音樂會。

陳蕾年初表示可以出20首歌，總算講得出做得到。

旅行都有熱血經歷

回顧人生最熱血的一件事，陳蕾表示除了來香港參加比賽，她表示最近與小塵埃及岑寧兒去大阪旅行，當時計程車在心齋橋塞車，便聽到附近有人busking玩jazz，她們原本打算去打街機，結果車一到目的地，四人沒說甚麼就一起跑回去聽那場演出，而平日不愛跑步的她，為了一場街頭音樂而奔跑，這樣的畫面覺得非常熱血。

與歌迷「互相扶持」

陳蕾以往的生活都非常慳儉，問到依家賺到錢消費模式有否改變？ 她笑言朋友說她依然慳儉，更自爆最愛慳隧道錢，為了避開某條隧道，寧願兜路多15分鐘行另一條路，而現在的她，最捨得花費在飲食和旅行住宿，特別是看演唱會，會買最貴的票價，希望得到最好的體驗。至於與歌迷的關係，她直言是「互相扶持」：「佢哋多謝我嘅音樂陪伴佢地，但其實係我多謝佢哋聽我嘅歌先啱。歌迷成日都會寫信俾我，我都鼓勵佢地唔好送禮物，因為屋企冇位放，加上若果我在人生低潮時，可以拎返呢啲手寫信出嚟，俾返一啲鼓勵我。」

Hair : Cliff @ Myos @moys_cliffchan
make up : Tammy Au @tammyau_makeup