有港女為「改善皮膚暗粒」，聽醫生建議食「事前口服避孕藥」，在食足近一個月後，突然「行唔到路」整隻左腳變紫，入院確診「靜脈+肺栓塞」瀕臨死亡邊緣，她在網上發警世帖文，意外發現尚有其他視避孕藥為神仙藥的受害人。
聽醫生建議食避孕藥改善皮膚 港女食足一個月左腳變紫險死 確診「靜脈+肺栓塞」 驚揭尚有受害人↓↓↓↓
女事主近日在社交平台Threads分享她食避孕藥「差啲冇命」的經歷，她形容是「血的教訓」。
她在帖文中表示，當初因為「醫生建議我食嚟 『改善皮膚暗粒』，諗都冇諗就開始食」，她坦言，以為避孕藥是「神仙藥」，可以「皮膚好、M準」，甚至「防癌」。
當避孕藥為神仙藥 食首星期：「天堂mode」
食避孕藥後第一個星期，她形容是「天堂mode」：「皮膚真係冇咁油！暗粒消失晒！開心到飛起～」
到第二個星期，她發現「左腳開始無故劇痛」，期間她有睇過醫生，「醫生都話ok，可以繼續食」。
至第三個星期，她「每晚扎醒」，「感覺呼吸唔到！要捲住條腰先瞓到」，她感到不對勁：「呢刻我100%肯定：身體響警號！」但心裡仍堅持繼續食那「神仙藥」（避孕藥）：「諗住：『頂埋呢個月就停！』」
結果到第四個星期，仍未夠一個月，她已入死亡邊緣：「有一日突然，行唔到路！左腳痛到爆炸！掀起褲腳… 成隻左腳變咗紫色！！！」
緊急入院：差啲…要一世食薄血藥
她緊急入院，最後確診：左邊深層靜脈栓塞 + 肺栓塞。深層靜脈栓塞是指，靜脈有血塊形成，堵住血流。肺栓塞則是血塊隨血流進入肺部，卡在肺動脈中，可能造成呼吸困難，是可以致命的急症。
女事主表示自己不是「任何高危人士，唔肥、冇食煙、40歲樓下」，但「差啲…要一世食薄血藥/做手術放支架通返條血管。」
經過今次教訓，她提出4點「用命換嘅警示」，包括：（1）「千祈唔好亂食避孕藥！唔係人人啱！」（2）「就算醫生開，必須定期檢查！」（3）「留意身體警號！痛、呼吸困難、胸痛、腳腫/變色 → 即停！即睇醫生！」（4）「冇「神仙藥」！所有藥都有風險！」
長期食避孕藥 有網民同患深層靜脈栓塞：差啲就bye bye
女事主的帖文引發熱烈迴響，意外引出原來尚有其他以避孕藥為神仙藥的受害人，有人留言表示：「……都係避孕藥，本身都有做開運動，上年入咗心臟ICU食咗半年薄血藥……醫生都話我差啲88（拜拜）。」
有人因此要長期食藥醫治：「一樣食完肺栓塞，宜家要一世食薄血藥。」「我食咗兩年肺栓，而家一世食薄血藥。」
有人食了半年避孕藥，留言表示出現「左腳深層靜脈栓塞」，結果「差啲就bye bye ，醫生話呢一世都要食薄血藥」。
有人和女事主情況相似：「一樣左腳巨腫，深靜脈栓塞肺栓塞，三年後確診埋APS（一種自體免疫疾病，導致血液在血管內過度凝固、形成血栓），一世華法林……」
有網民食8年避孕藥稱不覺有異樣 惟提醒不能「當糖食」
有人分享因為「經期唔準同勁M痛」，食了10年避孕藥，「突然間有日胃附近勁痛，痛到入院，之後做CT發現個肝有結節性增生，個size成個乒乓波咁大。醫生話部分患者同食避孕藥有關……已經唔敢再食。」
有人食了一個月避孕藥，「個胃就唔係好掂，同埋偏頭痛……以後都唔敢試」。
不過，部分網民留言指有定期食避孕藥，未見異樣：「食咗5年，身體完全冇事。」
有人說：「我食咗5、6年，因為有多囊，但係冇任何副作用，只係嚟M嚟四日同埋少量。」
有人食了8年避孕藥，亦未覺有問題，不過她指出避孕藥不能「當糖食」：「本身避孕藥個說明書，同副作用張紙，就成張枱布咁大，都無咩可能無副作用。」
來源：carmen_cheng_＠Threads
同場加映：九龍灣中醫診所疑$20淘寶藥收$800 被投訴稱「醫師心緒不寧畀錯」 事主爆後續更離譜↓↓↓↓
