從來冇買美股習慣，因覺得麻鬼煩，又要先兌美元，又唔知要抽幾多稅及手續費。所以，雖然幾年前分析及介紹過Lululemon，當時200美元出頭，一度爆升至400幾美元，不過，我冇乜動心，只暗暗覺得自己有眼光，正！
Lulu一日插水近兩成
留意Lulu，因衣櫃內有甚多「檸檬」，一着就唔會換牌子，肯定佢市場潛質極大。上周一，在毫無心理準備吓睇股價，嘩，搞乜鬼，「檸檬」一日內插水近兩成？
發生乜事？喂！剛剛公布第一季業績好理想喎，點解呢？分析師解畫指，因擔心美國關稅將令公司盈利大減，故被狂沽。
呢隻股，似足過山車，大上大落，波幅又密又大，捉正浪底的話，過去5年已可走多轉，大家上網睇睇5年走勢圖已知。尤其近1年，更誇張，好似癲癲哋。
舉例，此股去年8月5日跌至226美元 ，跟住似坐火箭，短短5個月剷上423美元 ，升9成，何其誇張！一上到高位，又掉頭落，今年4月8日，再撻落239美元 ，然後再立即反彈，6月3日見340美元。咁頻密玩高高低低，當然不是散戶，而是大大大戶睇中此股特性，舞高弄低。
關稅藉口如明日黃花
從過往的手法，好可能今次一日鋤兩成，又係玩先質低再彈高。每次質低，當然要搵個似層層的藉口，今次正是美國狂人總統亂加關稅。
喂，呢單野，好似有少少明日黃花喎。人人都在唱狂特TACO（Trump Always Chickens Out)，你睇佢點同中國deal就知，其實佢係二仔底，冇乜料到，別人一硬佢就縮。所以炒友用關稅來做低Lululemon，除非隻股真係有質變，又或市場大轉彎啫，睇來睇去唔係喎，兼且，第一季數字又好靚仔。
既然過去三年錯失咁多玩波浪機會，今次等我處男下海，試吓買佢啦。上周入貨價位是255美元，若跌，於220美元再double加碼。升又如何？到300美元後就每升20美元沽五分一。
且看今次處男食「檸檬」，食出個乜野結果。
資深傳媒人 曾智華
