黃秋生、蘇玉華及歐鎮灝等今晚（3日）到圓方出席主演電影《不赦之罪》首映禮，秋生指出品人之一的古天樂跟他傾了兩年才開拍此戲，又大讚歐鎮灝乖和肯學，至於蘇玉華就指自己在戲中也是受害者，又透露戲中最後一場戲，是自己拍攝時提出的意見，因覺得可以加入自己見加害者的戲份。
黃秋生邊拍邊俾意見
受訪時蘇玉華就指因劇本好，所以想看如何將它發揮到極致，加戲後也認為能將電影想傳達的訊息變得更圓滿，所以與導演和編劇傾過後就進行這件事，而秋生指也有邊拍邊俾意見。問到對票房是否有信心，秋生笑說：「聽好多人講話好睇，我原本唔睇，所以都嚟睇吓，講宗教咁鬼悶我點會睇！有時啲嘢好奇怪，拍嗰陣唔知搞乜，跟住又話好睇攞獎。」秋生又謂最初與古天樂洽談此戲的時候，因只有諗法沒有劇本，所以才會搞兩年，問到古天樂是否很欣賞他所以兩年前已找他？秋生即笑說：「唔知欣賞我定可憐我，救我命卦，佢好有心嘅！」兩人又謂有去謝票，蘇玉華指見到秋生謝票感覺驚訝，不過秋生就指現在拍戲難過結婚：「一世人一次兩次，有機會就好好享受，做埋呢鋪都唔知下一鋪幾時，（咁消極？）我份人唔樂觀，我唔係消極，我接受現實。」他又指因電影題材由於屬於宗教，就算在歐洲也會變得敏感。
蘇玉華老公大讚好睇
提到秋生早前在社交網站貼出長子黃一一的照片，被網民大讚靚仔之餘更可直接出道，秋生就表示大仔現時做鞋業經理，細仔則做有關設計的工作，又指大仔沒有興趣出道，因他以前也試過拍戲，但覺得辛苦：「佢最好就係坐喺度會發達，好有大志，好清晰！」而蘇玉華也讚黃一一靚仔，拍得住後生的秋生。蘇玉華表示老公已看了電影，還給予很好的評價，問到最近有戲院相繼結業，會否擔心影響票房？秋生表示不知道戲院如何排戲上映：「以前有院線，而家有院冇線，（口碑好會唔會對票房有信心啲？）如果得一間上，都係畀得兩個月你上。我最近喺度諗啲戲成日話幾多億，以前幾百間戲院，都係得幾千萬，而家戲院咁細又執笠，過億！陰司紙嚟（笑）！（口碑好會包場！）淨係做教會都發達。」至於蘇玉華指只能做好自己崗位要做的事情，至於大環境，就不到自己這些蟻民決定，只能望好電影會有多些人來看。
