吳若希（Jinny）於本月31日在澳門舉行處女個唱前夕，突然爆出與麥美恩「絕交風波」，這不僅與演唱會主題《Gossip of Me》相呼應，「反面」新聞更變成流量秘密碼。出道15年的Jinny從緋聞與是非中成長，最感慨當年的八卦新聞影響了她身邊的重要人，亦疏遠了一些朋友，但相信：真正的友誼會經得起考驗，所以麥美恩有得留低！ 採訪：方騫平 攝影：譚志光 場地：Hotel Pravo Hong Kong
吳若希7年前嫁給澳門人何兆鴻（Alex），作為「澳門新抱」的她第一次在澳門開演唱覺得有啲威威：「我老公等咗好耐㗎啦，佢多次問我『幾時喺澳門開騷？』」故今次要畀面個老公，做到最好唔衰得㗎，到時有藝人朋友、同期出道歌手、家人、密友等過嚟捧場，老公扮演票務及PR角色。」
壓力大到焦慮狀態
原先主辦單位有意在她32歲生日(23日)當晚開騷，她則希望正日生日能休息，故主辦單位就她推遲了一周開騷：「諗返轉頭有啲畀人呃嘅感覺，就算個騷唔係正日搞，開騷前都要排舞㗎啦。」她預言演唱會有好多舞蹈：「要體力勞動，所以努力做gym，操fit到一個鋼條身形，會健康性感。」演唱會監製指她身形可以做model行天橋，所以場內會搭建T型舞台和觀眾近距離接觸：「好多謝佢咁睇得起我，不過，到時着短裙要打底。」現階段Jinny忙到連放假、瞓覺及向老公發脾氣時間都冇，壓力大到處於焦慮狀態。
何範疇都會有堅持
有不少是非的Jinny唔避忌，反而選擇以Gossip(是非)做這次演唱會的主題：「我想畀人睇到我嘅性格及態度，多年嚟大家只喺聽歌、睇劇、睇報紙、雜誌、睇八卦是非新聞中認識我，大家未必好了解我，有啲人會鍾意我性格，亦認同我係一個有態度，喺任何範疇都係有堅持嘅人，我覺得咁樣幾ok及得意呀。」10多年做過「緋聞女王」的Jinny自豪有過「威水史」：「自己數過，當年同時期我有14個雜誌大封面，諗落都幾威㗎(緋聞樹入面有周志文、「大隻仔」溫家偉、黃子恆、吳業坤、沈震軒、蕭正楠、莊士國際太子莊家彬表哥蕭立莊、會計師郭志燊、地產富豪林棣權（十哥）、股壇狙擊手王弼燮10個『男友』)哈！原來我細個時咁有魅力㗎，都幾好幾正啫。」
負面新聞被朋友累
時至今日她剖白緋聞樹真相：「其實10個『男友』中只得兩個係交往過，一個係拍過5年拖嘅圈外前度；另一個藝人係一腳踏幾船嘅渣男，所以只係一齊咗半年，當中有啲係男性密友，其他嘅都係為劇集做宣傳。」食咗多年「死貓」的Jinny自爆連舊老闆(星夢何哲圖)都睇唔過眼出聲：「佢覺得我有呢啲負面新聞，係被呢班朋友拖累，所以好不滿話『點解要同呢啲人做朋友？』後來我重點唱歌，大家圈子唔同咗，自然疏遠一啲人，但，最唔開心緋聞影響到身邊重要朋友。」回顧緋聞最旺盛日子，她聲稱反而有年半真空期：「嗰時心諗『個天賜乜老公畀我就要乜呀！』後來遇就到Alex(現任老公)，所以好快一齊。」另外，她又試過被『朋友』出賣，將私人社交網的對話截圖向周刊洩密，初出道思想單純的她才發覺原來直腸直肚，坦率地對朋友講真話，都會被利用成為傷人「利器」，令她既傷心又無奈：「所以呢十年學會保持距離，唔好對所有人都交心，當然留底嘅就係真朋友。」
