屯門發生虐畜案。今（19日）早上9時41分，警方接報指湖景邨湖畔樓地下一個儲物室內藏有一批貓咪，懷疑遭受殘酷對待，警員到場了解，驚揭儲物室內養了10隻唐貓，貓糧已絕，室內無窗、無燈，欠缺通風設備，不見天日，貓屎滿地，發出惡臭，衛生環境惡劣，其後聯絡貓主到場，經調查後拘捕一名47歲姓林男子涉殘酷對待動物，案件交由屯門警區刑事調查隊第二隊跟進。
所有貓隻無表面傷，愛護動物協會及漁護署人員稍後到場，分別各檢走5隻貓咪檢驗。
現場是湖景邨湖畔樓地下一間儲物室，是房屋署外判清潔公司所使用。有份報警的毛守義工阿Kent指，早在一周前，有貓義工向他表示，懷疑該儲物室養有很多隻貓，該處是密封房間，門罅只能放一支很幼的鉛筆，義工發現內裏貓聲很嘈，他們曾將牙籤放在門罅測試，若有人推門而入，牙籤必掉下，結果發現五日五夜無人進內，即貓咪多日沒有人理會。
他說：「裏面冇窗，冇燈，傳出惡臭，好似阿摩尼亞，醃眼，鐵門密封，街坊曾用卡紙揳入食物，一揳入去，啲貓就打架，好似好肚餓爭食咁，我哋覺得有殘酷虐待動物成份，今日報警求助。警察一開門，至少有11、12隻貓仔衝出嚟，佢哋皮膚麻麻，瞇晒眼好似發炎，儲物室內應該冇晒貓糧，全部都係雜物，幾塊板上面全部係貓屎，充斥亞摩尼亞味，有盆水，但好污糟，放咗好耐。呢間房據講係外判清潔商主管用的，好多人都知道養咗貓，但冇處理。」
有街坊指，今年初已經常見有3至4隻貓在天井走來走去，不時有街坊投訴，但無人理，亦曾有街坊向貓主好言相勸，着他為貓咪做絕育手術，但對方態度惡劣。有街坊估計貓主不肯為貓咪做絕育手術，是有人刻意繁殖買賣。「重點係你唔係就咁養幾隻貓喎，儲物室環境差，冇窗冇燈，發出惡臭，我哋監測過五日，冇人開過門理過啲貓，又唔幫啲貓做絕育，懷疑有人私底下賣俾啲舖頭，儲物室係房署地方，唔可以養貓，投訴過又唔理，房署應該正視呢件事！」
