天后容祖兒連續第3年到澳門新濠影匯綜藝館舉辦《ETERNITY》演唱會，繼前兩年累積20場精彩演出後，自本月12日起展開最後10場壓軸篇章。首場演出即以重新編排歌單驚喜登場，狀態fit 到漏，更重現14年前吉他彈唱經典場面。英皇集團主席楊受成夫婦、閨蜜蔡卓妍及彭秀慧亦有驚喜捧場，令祖兒十分開心。除了唱歌外，祖兒更表示一定會到謝霆鋒的啟德演唱會取經。
重現《NO.6》個唱經典畫面
此次澳門演唱會，容祖兒特別重新設計節目流程，她坦言對近距離舞台格外珍惜：「難得能在這麼親密的場館與歌迷相聚，每首歌都變成萬人大合唱，第1場之後已經諗，得番9次，要好好珍惜。」演出中，她以一襲帥氣西裝造型自彈自唱代表作《空港》，重現《NO.6》演唱會經典畫面，「緊張到汗流浹背，因為太多汗，所以眼鏡差啲滑落。」
預告會有最新作品推出
堅持「年年革新」的祖兒不僅挑戰樂器演出，更打破傳統演唱會框架，「第3年站在同一個舞台，我好珍惜可以係咁近距離之下，同歌迷唱歌，大家一齊狂唱，聽到你哋合唱歌聲，每一次都好感動….第1場之後，我已經開始唔捨得，得番9場，好想每一場都見到班歌迷，好想剩番嗰9次，都一齊再狂唱，希望同大家為呢趟橫跨3年嘅音樂旅程，劃下璀璨句點！」她又表示，「希望係呢兩個月會出到最新作品啦，好多朋友不停問幾時有新歌，幾時有個人大型演唱會，唔好催，慢慢來，適當時侯就會出現，好冇？」歌迷紛紛回應：「等呀！等幾耐都等！」祖兒於下周復活節假期，及五一長假，也會於澳門跟歌迷共度，她透露已接獲眾多親友預告：「大家都說今年4、5月唔飛好遠啦，正好我係澳門，就決定近近地過澳門搵我，邊玩邊看演唱會。我聽到都好開心，到時會一定會好熱鬧。」
恨在啟德開騷
祖兒今次演出日期，與謝霆鋒演唱會撞期，笑問她是否要同霆鋒打對台，「真係本來打對台，但係天意安排，未知霆鋒個騷日期，係舊年已經定咗，霆鋒嗰幾日，我香港有工作，所以停一星期，個天都要我返嚟睇謝霆鋒，我可以係香港都好開心呀，我要再去啟德，睇霆鋒取經。」霆鋒25年來再次開騷，祖兒已是天后級人馬，仍需向霆鋒取經？祖兒笑說：「千祈唔好咁講，第一無論如何要支持老友霆鋒，第二，啟德呢個場，我都未做過，我咩經驗都冇，真心等睇霆鋒向佢取經。」言下之意，祖兒下一次再開個人大型演唱會，是否選址啟德？她說：「我都希望，但都係要睇所有配合，做埋澳門先再計劃，我喺台上都係咁同歌迷講，正在籌備新歌啦，大型演唱會幾時呀？唔好催啦，我哋努力緊㗎啦。」
