鄧麗欣（Stephy）今日（27日）出席於中環的時尚名店開幕，本月中剛完成紅館演唱會的Stephy在社交網仍不停分享相片和感受，坦言有嚴重「演唱會後遺症」感失落，要貼文感謝很多人，並花了一個星期下載演唱會相片，由於太多相未能盡出，仍有遺珠靚相，看着相片和片段像返回現場，情緒走不開，相信「演唱會後遺症」仍會持續一個月。
爆男友做埋演唱會工作人員
Stephy直言三場不夠喉，有意計劃舉行巡唱或開Part 2。問男友對演出有何評價？她說：「佢興奮過我，睇足3場，佢話呢場好過噚日，第三場又好過第二場，鼓勵性好強。佢仲做埋工作人員，幫我安排朋友影相同攞飛。」笑問完成紅館夢想可嫁得？她笑着反問：「關事咩？我分得好開，人生好多嘢追尋，紅館演唱會自己一直冇強求或係最終目標，追完呢個又有下一個，順着去。」
因Angela被攻擊而不開心
談到Theresa傅穎（現名傅寶誼）未有參與Cookies合體演出，令不和傳聞再惹揣測。對於Theresa在社交網回應缺席，對方指做每一項決定都有自己理由，心裏沒有討厭的人，未齊人合體是「好事」，大家仍有期盼。Stephy說：「正如佢所講，盼望係好重要。（你也盼望9位齊人合體？）對我嚟講只此一次，回憶只一次，已好唔容易，所以尾場觀眾有福氣。」對於Angela區文詩被指是始作俑者，她無奈說：「大家唔好再……呢啲字眼已過了20年，點解仲用呢啲字眼形容，大家大個，呢啲傳聞唔好再發酵。」Stephy表示知道Angela因此事被人留言攻擊，自己亦因此有點不開心，她說：「因為自己演唱會而成就這件事，一件開心事而導致佢畀人攻擊。我覺得佢係有智慧嘅人，唔會理無聊評論，但我唔想唔開心事發生，希望大家唔好講太多。」
Amanda S.預告將出埠拍電視節目
同場還有Amanda S.，她近日在中環為其甜品品牌開設pop up store，很開心回歸甜品界，由於反應熱烈，為期一個月的期間限定店看看會否延長時期。她亦想開設實體店，但租金很大壓力，近半年四出逛逛，見到香港很多不同甜品和咖啡店，店舖越來越靚。另外，她將出埠拍攝電視節目感到很開心。
