人稱「四叔」、恒基地產集團創辦人李兆基逝世，享年97歲。不少前員工在網上發帖懷念這位好老闆，有網民的母親曾在四叔公司負責清潔，他說：「我媽成日話呢個老闆好好人！」
當時該網民家裡開了一間髮型屋，「有次我媽話介紹咗老闆來我哋髮型屋剪頭(髮)，我同阿哥笑笑口以為講笑」，誰料過兩日「真係有兩個西裝友，一老一後生來搵我地剪頭……」
該網民今日（18日）凌晨在「90年代回憶 (新版)」FB專頁發帖，悼念「四叔」李兆基，並憶述以下這段與四叔的「剪髮奇緣」：
李兆基逝世｜公司清潔女工兒子憶與四叔「剪髮奇緣」：「我媽話介紹咗老闆來剪頭髮，過兩日真係…」臨走再咁鼓勵↓↓↓↓
有網民今日（18日）凌晨在網上發帖悼念「四叔」李兆基，他表示，「我細個我媽幫佢（四叔）打工做寫字樓清潔」，「我媽成日話呢個老闆好好人，就算對住最底下層的工人都一視同仁，新年又會親自派利時，仲好大封。」
當時，樓主家開了一間髮型屋，「有次我媽話介紹咗老闆來我哋髮型屋剪頭(髮)，我同阿哥笑笑口以為講笑。」
「點知過兩日真係有兩個西裝友，一老一後生來搵我哋剪頭。」他回憶說，當時晚上八點幾就收鋪，「一入到嚟，個後生問仲做唔做生意，我哥話做後，個老就坐低，個後生就企咗係門口睇夜報。」
「問佢點剪，佢話剪得佢靚仔就得啦」
樓主說，當時他「幫個老洗頭，我哥幫佢剪」，他哥哥「問佢點剪，佢話剪得佢靚仔就得啦」，「我大佬唔識世界，讚佢型過呂良偉，大家一齊笑。」
當時樓主和哥哥仍不知這位西裝客的身份，「之後佢話係阿玲（樓主母親）介紹來，我哋先知呢個就係我哋媽講的老闆……之後全程大家都沒講嘢，剪完老闆笑笑口話真係靚仔咗。」
臨走舉大姆指鼓勵：「好好做，有心做，生意一定會做好」
樓主說，老闆「走時又係笑笑口」，並鼓勵他們兩兄弟，「舉隻大姆指畀我地話：好好做，有心做，生意一定會做好」。
「呢日之後，髮型屋陸續多咗好多西裝友或貴婦幫襯，到現在我都仲記得我媽呢個老闆舉起大姆指個樣。」
網民激讚：呢D真係記成世
帖文引發熱烈迴響，網民紛紛留言讚賞：「呢D真係記成世，一個清潔阿姐同佢講嘅嘢都記住，特登去幫襯，同你哋有講有笑又鼓勵你哋，仲要同啲下屬講叫佢哋幫襯吓你哋，真係抵佢咁有錢同埋咁勁！」
「真正的老闆句句精簡，字字鏗鏘，簡單的一句說話看似正面但普通，卻令我們小市民記得一輩子，沒錯，有心做任何事一定會做好的，多謝四叔。」
前員工感激懷念：我記得SARS期間，你講過恒基不會炒一位員工
有曾在四叔公司工作的前員工亦留言大讚他是好老闆，對待下屬非常好：「永遠懷念我心中的一個好老闆。我記得SARS期間，你曾講過恒基不會因此而炒一位員工，繼續好好工作，好感激你對每一位員工的關顧。」
「我係前員工，你講得啱，除咗大利是我未收過之外，其餘benefits就係你所講一樣，lunch、麵包全部包晒……」「（公司包）有午飯，每天派包……姐姐攞一大盒（麵包）入來自己揀。」
「識人係佢旗下公司做，包伙食，有麵包生果派，冇指定退休年齡，收過幾次抱孫大利是，今時今日肯包伙食老闆真係小之又小。」
「我係離開了恒基幾年的前員工……收過大利是，公司好好。」「非常好老闆派利是畀員工都好大封。」
「多謝四叔嘅恒基兆業令好多人平凡人可以安居。」
相關新聞︰
李兆基逝世︱清華百年校慶捐¥3億 大談行善如做生意「一兩撥千斤」
李兆基逝世︱重溫四叔十大金句！勸戒年輕人「經濟未定不宜早婚」 勿被置業困住夢想
李兆基逝世︱兒孫滿堂「九年抱七」成佳話 抱孫即派員工萬元利是
李兆基逝世︱創商業王國業務遍布港人衣食住行 樂於行善屢捐款捐地
李兆基逝世｜兩子分工接棒 四叔讚「家傑靈活、家誠實幹」 定三大家訓：不可忘本
