「最索經理人」林寶玉有勇有謀，年前成功捧起藝人薛影儀，由香港紅到大馬。不過，林寶玉提醒自己於新的一年要學精啲，原來去年被呃兩次，繼網購1折商務機票中招後，再幫朋友撲劉德華個唱門票，誤墮網上炒飛陷阱，遭連環被騙損失2萬元，惜追究無門。 採訪：方騫平 場地：the market @hotel icon
「遠離」薛影儀年半的林寶玉事業走得更遠，除經營美容生意外，年初更成立娛樂公司，接洽經理人、電影、製作等工作。對於阿儀多次出言攻擊「咬住」她唔放，去年兩人活動中聚頭，又當眾大鬧寶玉是「死八婆」！難得林寶玉唔嬲反笑。
跟阿儀3年緣份
林寶玉指阿儀的舉動難以理解：「佢每次鬧完我，都會禮貌地邀請我睇返，只能話，每個人表達愛意嘅方法都唔同，阿儀表達形式別樹一格，而且我覺得喺佢心目中，我份量好高，所以成日會記掛住我。(咁你點回應佢？)我零回覆，亦冇興趣睇，睇完都唔知有乜好講。」林寶玉不得不承認和阿儀好有緣份：「記得我哋第一年合作時，睇相話我哋都有一粒名氣聲，碰埋成就咗阿儀『黃金3年』。」
近日林寶玉成立娛樂公司，她不排除投放資金開戲，坦言如果經濟許可，都想做返多些幕前，尤其擺脫做花瓶，想試下做癲婆。正因工作太忙，感情生活一片空白，追問索爆林寶玉可有被富商追求？她冇否定，笑說：「我唔知點界定係富商？喺我眼中只要有上進心，未來發展及賺錢空間好大。不過，𠵱家最多聽到追求者嗰句係『你太忙、太強唔知點追你。』」林寶玉提醒自己新一年除要放慢腳步外更要醒目些：「我好少睇新聞，去年網購1折商務機票中招，被呃$15000。」之後她心急幫朋友撲劉德華個唱門票，再誤墮網上炒飛陷阱：「我仲以為買家係信得過嘅愛心媽媽，所以由最初買2張加碼到8張，仲落咗$4000訂金，點知約好交收後就失聯…」她自嘲道：「唉！我咁好呃，唯一好彩冇畀人呃咗去KK園區。」
