當《哪吒之魔童鬧海》嘅票房數字好似坐火箭咁飆升，票房狂攬148億，全球影史第七，鍾意睇戲又鍾意八卦市場發生咩事嘅我，見到Tvb星期五黃金時段在七星連珠嘅晚上，讓路俾《哪吒1》播影， 當然要開着久違咗嘅電視機， 順便同個寶貝女親子樂，全家睇卡通。點知阿女睇完套《哪吒1》，就同佢阿媽講：「我一定要入戲院睇《哪吒2》」。 睇完，不負眾望，我真係要俾個讚。至於點解讚？各花入各眼，睇戲呢啲嘢好主觀，所以都係等你哋自己睇。
不過，從投資者角度去睇，背後的大金主、最大贏家光線傳媒（300251）股價早前連環漲停，泡泡瑪特（9992）啲盲盒被搶到連股價都破晒頂，升至近123元，大摩仲望135元。呢啲商業現象，其實砌緊幅後生仔嘅發達秘笈地圖。與其話係愛國情懷大爆發，不如話係後生投資者用真銀紙重新定義緊「中國價值」。
1. 二次元經濟打爛傳統投資飯碗
光線傳媒嘅漲停板背後，其實係中國動畫電影工業化嘅大變身。由《大聖歸來》到《魔童降世》再到而家《哪吒之魔童鬧海》，製作周期由5年縮到3年，特效鏡頭由60%加到80%，呢啲數字唔單止講技術突破，更加係成套IP開發機制成熟嘅證明。當傳統電影公司仲為流量明星嘅天價片酬頭痕，動漫IP已經用「零片酬」嘅虛擬偶像殺出新血路。
2. 泡泡瑪特破頂嘅後生仔經濟學
喺深圳萬象城泡泡瑪特旗艦店，你可以見到JK制服少女同潮牌後生仔，好似考古學家咁專注搖盲盒。呢種睇落唔理智嘅消費行為，其實暗合行為經濟學嘅「驚喜溢價」理論。當00後消費者為59蚊盲盒付出300%情感溢價，佢哋買嘅唔係玩具，而係社交貨幣同埋朋友圈認證。
3. 軟實力變現要靠硬橋硬馬
有券商研究所數據顯示，故宮文創年收15億嘅背後，係超過200人專業設計團隊同76項外觀專利撐腰嘅工業化生產。呢個提醒投資者，文化產品成功唔係撞手神，而係供應鏈管理、用戶畫像分析、大數據營銷呢啲現代商業手段嘅系統性勝利。
企喺投資角度睇，而家後生仔正用「為愛發電」嘅方式改造消費市場。但精明的投資者應該要識睇，真正有料到嘅「愛國概念股」，肯定係嗰啲能夠將文化符號變做標準化產品嘅企業。當你睇住日線圖又有一隻「宅男快樂股」漲停時，不妨開個B站睇睇00後嘅彈幕狂歡——嗰度先至藏住真．發達密碼。講到尾呢個時代，得後生仔者得天下，我個女就係其中一個最好證明。但想坐穩江山，仲要睇企業識唔識將文化情懷塞入工業化流水線。 能夠成功突圍嘅IP股， 實在不容忽視。
林小珍
相關文章：
Deliveroo撤退、KeeTa崛起 美團攻中東可複製奇蹟？｜梁偉聰
