林盛斌（Bob）日前在紅館舉行棟篤笑《The Bobfather Finale 2025》，圈中出名好人緣的他獲過半百藝人好友捧場。而沉澱幾天後，阿Bob 昨晚（10日）在社交網分享騷後感，並自爆被網民嘲「不自量力」。
Bob認不自量力
Bob表示今次做這個show，收到好多朋友的祝福，但同時亦都有很多冷嘲熱諷，「其中我見到有一個網友留言，佢話『不自量力』，我諗一個正常人見到可能會好唔開心，但係我冇。因為佢係講得啱，你哋去紅館去睇一個show，係一件好理所當然嘅事，但係Bob喺紅館開talk show，真係一件幾不自量力嘅事嚟㗎！」
相關文章︰女神配對計劃丨林盛斌戥胡定欣「脫單」開心 冇跟洪永城爭功：男方的確係佢朋友 16歲大女強大不在意外界目光
Bob跳出舒適圈
雖然被網民嘲諷，不過Bob依然充滿正能量，認為「不自量力」並非貶義詞，而是一種想法、信念去話畀自己知，要改變、挑戰自己，冒險去跳出自己舒適圈。他續指其實自己可以好安逸地繼續做活動主持、宴會司儀等，「對我嚟講，係一件非常舒適同冇乜難度嘅事，但係，我想我嘅人生，係可以繼續慢慢進步，我想我嘅眼光同埋格局，可以慢慢提升去更高嘅層次。有兩句說話，我成日同自己講：『當你想得到一啲你從來未擁有過嘅嘢，就要嘗試做一啲你從來都未做過嘅事』。」
Bob開show感自豪
Bob表示雖被網民挖苦「不自量力」，但更加證明他越級挑戰去紅館這個決定是正確的，「因為我做緊一啲旁人覺得完全冇可能，又或者係超出佢想像嘅嘢。如果只係做自己能力範圍內嘅事，永遠係最安全嘅，但係你永遠都只會係咁，唔會有咩好大嘅改變，唔會有咩好大嘅進步，而我，唔希望自己係咁。我覺得，做人，有時就係要不自量力。」他再笑言希望二三十年之後，可以有一日同自己孫仔孫女講：「你爺爺、你公公，即係我，以前喺紅館開過talk show㗎！」最後，Bob再次多謝台前幕後所有工作人員，更表示主辦及協辦單位應該開心，因為今次個show賺到少少錢，並指自己還有很多可以改善的地方，希望下次再有機會可以做得更加好，他說休息過後，繼續向下一個目標進發。
