40歲的林景程(阿King)演過《香港愛情故事》、《下流上車族》等不少好戲，演技一致受好評，直至今年初才憑《反黑英雄》「開齋」，呆晒的上台奪取TVB頒獎禮「最佳男配角」獎。獎項得來不易，自揭16年來自己錯過又被玩過！除了受過某些導演氣，被玩好委屈外；在新人階段犯過大錯，搞到被小生黑面搶走兼怒擲劇本，時至今日畫面仍歷歷在目說：「佢咁惡我唔怪，係我搞禍咗場戲。」 採訪：方騫平 攝影：譚志光 場地：Tsim house company limited
林景程是一名專業的物理治療師，2009年參加《超級巨聲》入行，由於原先職業薪金比做演員高一大截，多年來要兩份工作兼顧去養家，並且要承受老父反對聲音。
奪獎遭老父撥冷水
獲獎阿King跟爸爸開心Share，點知卻被潑冷水：「爸爸問我『有冇獎金？有冇加人工㗎？咁要個獎嚟做乜？都冇用嘅！』我解釋係一個值得紀念嘅里程碑。不過，我諗佢心底會戥我開心嘅，因為頒獎禮前夕曾心血來潮陪爸爸返去舊居飲茶，佢仲帶我去同啲舊街坊影合照，口裡說不，行動最實際，我見當時爸爸好開心，只不過佢冇表達出嚟，見佢開心咁我都好開心。」阿King沒想過要扭轉爸爸向錢看的想法：「我明白佢嘅年代冇嘢做會手停口停，要信服到佢，我可以賺到大錢，佢先至會唔擔心我。如果有日佢肯要我多啲生活費，應該相信個仔經已生活無憂。」
被網民指他「終於捱出頭」，阿King卻表示，奪獎後冇乜改變，亦無意改變生活模式，唯一最大是心態上有轉變，要對得住個獎，容錯率會變低：「自己最清楚做衰咗喺邊，睇返獲獎作品《反黑英雄》，好多地方都要執一執，尤其未能把握到僅有嘅戲份交代每個段落層次，即使得獎仍然係抱住懷疑態度，有咁多『沙石』，係咪做得到『最佳男配』呢？因為個獎交得畀你，即係代表你可以全部做得到。」
犯錯連累當紅小生
提到辛酸史，阿King都有「大大鑊」的難忘經歷：「入行不久客串做醫生，我以為嗰場戲冇劇本要『飛紙仔』，一直在等『紙仔』，直至臨拍前先知係我搞錯，好衰唔衰拍嗰場戲講生離死別，由我向家屬交代病者病情，呢場戲對後續劇情有好大影響，個個對手情緒到喺度爆喊，我就係咁NG影響到佢哋喊，當時導演忟到索性唔take我，叫我拎住劇本嚟讀，但作為新人有咁大壓力更加驚到口震震，乜都做唔到，最後我俾小生對手，一手搶走咗我手上嘅劇本，再將嗰份劇本拋走咗，好惡咁話『照意思講就算，畀我做咗戲先！』我唯有硬住頭皮，避開啲醫學名詞將大概記得嘅意思講一次，咁樣反而成事！」回想當時難堪場面，嚇到猛講對唔住：「小生對手的確係有啲惡，因為佢好入戲，狀態處於憤怒及悲傷情緒之間，係惡喺個角色入面，就算佢惡我都接受，因為喊住仲要take2-3次，有咁嘅反應好合理。」阿King重提仍耿耿於懷，再認衰仔：「係我搞禍咗場戲，無論係點，演員要處理好對白問題，點都係不能原諒。」
被導演玩無所適從
另外，演藝生涯中又試過被導演無理針對，感覺受委屈：「嗰場戲講我要望住門口，若有所思，再繼續食飯，拍完第一次後，導演過來提點：『景程，望咁耐做乜？唔好搞咁多嘢！』我咪按佢指示做，點知後來畀監製怪責，指正『其實望係有意思嘅，可以望耐少少』正無言時，導演走埋嚟加句『係囉，景程自然啲做啦！』」另一場戲要他在報紙檔踎低睇書，然後再起身走人，同一位導演依然狂叫NG：「我都無所適從，睇返playback見所有動作咪做咗囉，發生乜事呢？跟住同佢講返，個導演仲發晒忟憎回應『你鍾意點做就點做啦！』後來聽講，呢位已離職嘅導演專針對新演員，所以只能硬食，而且演員得罪導演冇運行。」
