近期環球風險資產同時走弱，剩下歐洲股市仍繼續創新高。其中一個原因是，無論關稅戰定美國滯脹憂慮之下，傳統股都能夠成為避風港，而歐股主要指數以傳統股為主，倫敦富時100指數更加係「零科技股」，因此反而受惠目前形勢。
新一輪恐慌或因就業數據
美股主要指數下跌，但單睇抗跌力強嘅傳統股，其實一樣強勢，例如醫藥股艾伯維（ABBV）、煙草股Philip Morris（PM)、強生（JNJ）、寶潔（PG）、3M（MMM）等，反映避險情緒高漲，但當避險情緒升至高峰時，呢類傳統股都可能跟跌埋一份。
風險資產全面逆轉之時，有可能見到新一輪恐慌出現，跌勢先會告終。風險資產會跌到咩程度？假如今個星期公布嘅連串美國就業數據遜預期，恐怕美股跌勢唔會比舊年7、8月弱，皆因大家擔心美國經濟等唔到下半年減息前就進入衰退。目前市場預期周五公布2月美國失業率4.1%，較1月4%上升。
宜留意美元及傳統股走勢
跌市見底前，我哋首先要見到美元升勢加快，美債息、黃金價格、Bitcoin跌幅擴大。其次，上述傳統股都受拖累，連歐股都跟住插水，包括美股在內嘅風險資產先可能超賣回穩。
綜觀目前未見到超賣見底訊號，個股方面，投資者持貨先減持後撈底，感覺有啲遲，但仍可考慮做。
下半年可憧憬減稅兼減息
滯脹風險有幾高？即使經濟偏弱，物價反映關稅大約3個月影響過後，通脹風險未必高，下半年美國減企業稅兼可能減息，市場有機會憧憬美國成功刺激經濟，帶動美股回復強勢，換言之，美股潛在利好因素上半年內難有眉目，於是先來一個跌到你驚嘅跌市。
之前估計3月美股一浪低於一浪，但假如3月初美股跌市低位已經夠深，稍後反而有機會回復一浪高於一浪。
市場正在厭惡風險，我哋顧掂呢轉跌市先講，之後市況再逐步睇。
晉佳
https://www.patreon.com/user?u=28525578
相關文章：
