朱栢謙在ViuTV話題劇《弊傢伙！我要去祓魔》，跟身兼編、導、監的戚家基（Peter）首度合作，飾演大反派「萬無極」，Peter認為角色非朱謙莫屬。而朱謙直言因跟 Peter同樣中二病而一拍即合，很欣賞這套大癲之作，單聽故事已𦧲飯應話「死都要拍」，完成後更認為自己能參與感到很驕傲。採訪：杜杜
Peter坦承選朱謙演「萬無極」，因他有齊角色特質，「呢個角色需要個氣場，首先係個領袖，其次講嘢要有威嚴，再者講嘢會有人真心相信，呢個真係最難，要搵個有威嚴嘅領袖好多人都得，而佢就咁同你講嘢把聲就有呢個力量，呢樣嘢佢喺舞台上係無敵。」最搞笑Peter首次見朱謙時，為表誠意角色不作他人選竟然話：「呢個角色係要搵你演，唔可以搵你細佬（朱栢康）做，哈哈！」
CG做足1年半竟冇超支
Peter坦言也擔心朱謙除檔期外，也有可能不接，「我哋個劇傻，係中二病，好多人見到會驚，搵佢時好驚佢會唔會藐？！」但兩人傾談後，朱謙已二話不說答應，「點知我都係中二病，我哋志趣相投，好彩搵咗我，我係𦧲飯應，呢個角色真係好正、好勁！我唔記得當時檔期點，但我同佢講我死都要做，同埋佢動漫嘅文化涉獵係又濶又深，佢拍呢個劇蒸餾出嚟嘅嘢，畀觀眾睇到係會好精彩。」拍完後朱謙更加愛這套作品，「拍《教束》係我最快樂、最難忘嘅時光，好鍾意呢個作品，其他拍過嘅作品唔係唔好，但係我會講《祓魔》係勁、大癲！點可以拍到，淨係睇啲角色造型都黐線㗎，拍到呢套戲係驕傲！」
由於該劇台前幕後都好有火，拍得超投入，朱謙形容「Peter Tsi」才是最大的邪教，「我哋都入咗呢個教，Peter真係勁，應該開多啲戲。」而該劇做了1年半後期，製作費一樣沒有超支，Peter認為全靠有班好戰友，「慚愧地CG第1輪做出嚟唔係好滿意，要再做多輪，但製作費都係ViuTV做開60萬1集個價，所以話真係有班好人，我想同其他製作人、投資者講，唔好以為出呢個錢真係有呢個製作，全部係好多人嘅熱情同埋愛，有心先可以做到。」
