無論港股抑或美股，都出現調整壓力。其中，美股2月尚未出現過任何具意義調整，而具意義調整過去每個月總會發生。以納斯達克100指數NDX為例，每月都會出現至少2至3%嘅調整幅度。
睇返星期二當晚，個股開始升勢乏力；而星期三晚，Mag7股份支撐主要指數，而二、三線股已經開始下跌。
另有報道指美國國防部長Pete Hegseth指令美軍準備未來5年削減支出方案，幅度每年達到8%，換言之，5年後軍費支出將削減三分之一。消息觸發AI概念軍工股Palantir（PLTR）及Axon（AXON）分別慘跌10%及16%，反應之劇烈，亦睇得出投資者想從高估值股份之中逃出，風險胃納正在下降。因此，呢輪美股調整未必三兩日就完成，有心理準備出現持續整固。
二三線股大跌料僅開始
以NDX目前調整幅度有限，但個股已出現一定下跌幅度之下，即使稍後指數微跌2%至3%，預計部分二、三線股大跌嘅慘案頻頻出現，目前只係一個開始。
至於已經慘跌嘅Palantir，假設受影響幅度最多係國防開支減幅嘅三分之一，以第四季美國政府收入佔Palantir 41%計算，Palantir股價下跌14%大概足夠反映事件影響，當然，仲未計算市況轉冷可能對Palantir股價嘅額外拖累。
股價目前回撤至106美元可謂合理反映負面因素，如果隨住調整市繼續進行，股價回落至100美元水平，吸納等待下半年AI概念再翻炒，仍然係唔錯選擇。
相關文章：
