蛇年大吉，HOY TV一向勇於創新，今個新春就與文創產業發展處「創意智優計劃」第二度合作，合作推出多個精彩節目，「HOY」創先河!除咗春晚盛典《粵來粵好過大年》、旅遊資訊節目《灣區過新年》，仲有首個自家製微短劇《我家有囍事》，與香港、大灣區以至世界各地的華人一齊歡度春節，為全球華人送上新年祝福。
由HOYTV與廣東台聯合製作的春晚盛典《粵來粵好過大年》將於年廿九播出，透過表演晚會，連繫世界各地的華人，將春節文化傳承。今年春晚的歌手嘉賓陣容全面升級，更多香港歌手參與，包括張衞健、林志美、鍾嘉欣、周柏豪、尹光等，以及一眾星演旗下歌手，橫跨老中青三代，以不同形式、主題，展示香港的生氣活力，為新春獻唱。
周柏豪歌聲穿梭時空
其中柏豪更透過XR技術穿梭不同時空，配合演唱多首名曲，更會與一位意想不到的朋友合作演出，驚喜連連。而廣東衛視亦會邀請周筆暢、孫楠、陳立農等巨星同大家共慶新春，節目將於除夕夜當晚於HOYTV、廣東衛視、珠江頻道、加拿大Fairchild新時代電視及馬來西亞Media Prima 8TV播放，與大灣區以至世界各地華人歡度春晚，共賀新春。
今年HOYTV特設公開招募香港民間青年團體為春晚獻技，最終選出8個團體超過400位表演者參與其中幾個大型表演，更邀請了多位歌手藝人特別演出，包括張衞健驚喜現身獻唱多首經典歌曲，為觀眾送上專屬「大聖爺」的回憶殺，由遊戲動作演員殷凱帶領140位小朋友同台演出，向中國古典名著《西遊記》致敬；尹光與兩組民間舞獅團體破天方合作，以LED舞獅與傳統舞獅，配合高難度技藝踏「山庄」演出；黃智雯孖中國鼓團體及踢踏舞團體，為春晚創作一場中西文化匯演；HANA菊梓喬與民間中樂團以國風編曲重新演繹經典金曲；伍允龍、曹星如夥拍民間武術團體帶來精彩的功夫表演，延續功夫熱潮。
蘇韻姿、陳思圻《灣區過新年》
將於大年初二播出的新年精選節目《灣區過新年》，就由兩位主持人蘇韻姿及陳思圻呢兩個竹昇妹，走訪大灣區三個城市 — 中山、佛山和深圳，感受當地人如何慶祝這個重要的傳統佳節。佢哋會去睇吓中山居民嘅團圓飯到底有幾豐盛？如何將當地特產食材食品加入新春美食之中？又去到佛山欣賞當地的藝術文化，剪紙及綵燈會藝術，走訪貼春街了解吓傳統與年青新派揮春有何特別？最後，去到與港為鄰的深圳，這個由外來人聚成的現代化城市，如何打造一個可以滿足「打卡文化」的濃厚新年氣氛。
微短劇《我家有囍事》
近年微短劇大受觀眾喜愛，HOYTV 於蛇年新春期間推出首個自家微短劇《我家有囍事》，今次是HOY 與文創產業發展處「創意智優計劃」第二度合作，亦是本間三個電視台首創，未來亦會研發微短劇發展的可能性，頭炮找來林德信、林穎彤、梁茵、七仙羽、李尚正、盧頌恩、阮偉倫等主演，為大家於今個蛇年帶來無限歡樂! 「幾時結婚」往往是大家新年遇到「最棘手」的親戚問題排行榜首位，HOYTV希望創作一部以團圓及愛情的浪漫喜劇慶祝元宵佳節，寄望大家笑餐飽之餘，亦祝願大家能夠有情人終成眷屬，未找到伴侶的早日找到心中所愛。
首次拍攝微短劇的林穎彤(Bella)，七師傅和阮偉倫，都對新劇充滿期待! 當中Bella表示可以同七師傅合作覺得非常開心：「之前喺HOYTV嘅其他綜藝節目都有見過七師傅，但今次可以做佢個疑似新抱仔，真係非常興奮! 喺佢身邊好似好有安全感，有人依賴咁! 」而阿倫亦非常滿意自己這個躺平的角色：「我今次做一個受盡萬千寵愛嘅孻仔，一事無成，但係有七師傅呢個媽咪，梗係享受下呢種躺平嘅感覺，日日淨係攬住佢，同埋問候佢! 」Bella今次飾演的是一個非常有錢的千金小姐，她亦笑言和現實完全相反：「今次呢個角色，我都要花好多時間去研究，因為除咗內容搞笑之外，我呢一個角色都好跳掣，仲要同梁茵爭林德信喎! 咁要諗下點樣演繹會比較好。」現場所見，七師傅不斷爆肚，簡直殺大家一個措手不及：「因為微短劇一定要搞笑，一定要誇張，太平淡就唔好睇，所以裏面啲字眼要好爆，等人哋諗唔到，大家先至會CLS! 而之前我都有講過Bella一定會做女主角，而家真係做到啦! 因為我覺得佢個樣靚，同埋冇整容，呢個市面上真係好少㗎喇! 」
林德信林穎彤梁茵大搞三角戀
另外，講到Bella於劇中和公認靚仔的林德信(Alex)和梁茵(Kiko)大搞三角戀，Kiko大爆自己角色是拜金女：「因為屋企人自細都係教育我要嫁個有錢人，所以一知道Alex嘅角色係一個有錢仔，又靚靚仔仔咁，所以就非常傾慕佢! 」而Alex笑言自己所飾演的角色「傻傻地」：「我喺劇裏面係一個會計師，會周旋喺Bella同埋Kiko之間，我覺得自己好似傻傻哋咁，太過nice唔識得say no，但始終呢一套劇都係一套賀歲劇，所以當中嘅內容都會比較誇張同搞笑，同埋有埋七師傅喺度狂爆肚加持，我都好期待同佢一齊玩下，每次都會有驚喜! 」
講到驚喜，莫過於合作無間的李尚正和盧頌恩，破天荒首次飾演兩夫妻，阿正表示同妹頭應該沒有親密場面：「我哋做一對被安排結婚嘅夫妻，主要場口鬧交居多，所以應該冇一啲肉博嘅場面，但我應該會同另外一個演員有動作戲，咁當然啦! 可以做到妹姐嘅老公，我感到非常之榮幸! 」而妹頭亦笑言，知道要做正爺的老婆，還會長時期困獸鬥，感到非常興奮。
