筆者上周二又俾N人纏住問：「碌Sir，隻布魯可（325）認購火熱，超額幾千倍，你有冇去馬呀？」我答得決絕：「一手都唔投！」
金融世界中，很多人、事、物皆是假的，空心冇料的，甚或是個陷阱引你入局劏的。其中之一為新股上市時的超額認購倍數，若你單睇有幾多倍而決定瞓身，又或上市後追入，咁就分分鐘中招，流血不止。
毛記搭棚引散戶 劏到一頸血
較遠的當然是認購王毛記葵涌（1716），於2017年上市，公開發售超購6,289倍，簡直瘋狂。小弟是資深傳媒人，對傳媒的運作及資產價值有點掌握，故肯定這是個「水魚局」，純賣知名度，然後由莊家搭個大棚引散戶上當。結果有無數水魚自動爬入籠，真係唔俾人劏到一頸血，就唔係鱷魚潭！
毛記葵涌令人瘋狂，因招股價為1.2元，但被炒家聯手一夾，曾爆升上11.2元，跟進的無不如痴如醉，以為可以終身打跛腳長歎。但當然逃不出「火箭式上升，斷崖式下插」。跟着幾年任何價位入的皆血流成河，屍橫遍野。今日股價多少？可能已經冇乜人再有興趣知了（本周一收報0.365元）。
「橋」唔怕舊，有水魚信就掂，因散戶特性，除貪心無知外，全皆極度善忘，以為歷史是過去式，不會重現。
抽草姬唔識落車 全部變蟹貨
終於上月又再來一煲，正是借藝員郭晉安名義上市的草姬集團（2593），又被莊家玩到出神入化，成功造勢，結果我一睇……嘩，咁都得？但真係得，竟然成為香港新股超額認購排行榜第2位，超過6,000倍！
理所當然，所有以為可以搭一轉順風車短炒獲利的，大部分被「割韭菜」。上市3.75元，曾經炒一炒至5.05元，唔識落車就邊個揸邊個傷，如今跌到1.98元左右，上市數周就全部變蟹貨。
再講一次，任何上市新股皆不值認購，因十之七八你無法掌握佢真正營商概念，尤其大股東及董事局誠信，根本無長遠紀錄畀你翻查，你咁嘅情況就入局，與水魚自動入棚俾人劏有乜分別？
投資者蝕本，冇人會同情，自己執生！
資深傳媒人 曾智華
相關文章：
