九龍灣宏基街上周五發生（3日）致命車禍，27歲姓黃鐵騎士遭警方追截，其間疑有一名休班男海關站在路中心「攔車」，鐵騎士閃避不及，連人帶車撞柱身亡。死者的母親及女友今日（6日）接受傳媒訪問，雙雙哭成淚人，泣不成聲，其中黃母更一度哽咽氣促表示：「我心情平伏唔到，好難接受，我湊到佢咁大個，投身社會準備成家立室，點解現實咁殘忍，我真係接受唔到，真係死得好冤枉」。
姓黃死者的母親及女友梁小姐晚上向記者表示，死者洋名叫Ken，其父早年因癌症離世，之後由母親含辛茹苦湊大，有一個20歲仍在讀書的弟弟，他早前於都會大學畢業，主修旅遊及酒店，為人孝順節儉，對家人及朋友都非常好。
相關報道：攔車休班海關涉干預汽車罪被捕保釋 警將徵詢律政司意見
視對方為靈魂伴侶 「有好多共同話題得我同佢知」
梁小姐指與男友曾在美容公司做行政工作，但工作一段時間後便辭職，之後一直待業。她形容男友為人節儉老實，而且很善良，雖然只是拍拖3年多，但已視對方為靈魂伴侶，「我哋大學時已經識，佢份人好慳，佢係同我一齊先食貴少少，佢同我講可以每日都食$28叉雞飯，佢覺得呢個生活唔難受，又可以慳到錢…佢有同我講過啲夢想，佢話希望發咗達之後，可以幫啲有idea（想法）嘅人，真係好難受，有好多共同話題得我同佢知，我哋仲一齊養咗好多寵物，包括7隻唔同品種嘅同鬃獅蜥」。
梁小姐又稱男友經常與她提及很喜歡車，獲得電單車牌後立即購買一輛電單車，其後在車友介紹下，才購入今次出事的大馬力電單車「大R」。她指當時男友購入新電單車時完全不知情，「佢買完之後仲問我隻色靚唔靚，嗰陣我仲答咁醜樣咁普通嘅！」她更向記者表示，從男朋友的駕駛態度，可以看出其為人，「佢同我講冬天去遊車河揸電單車先舒服，夏天就應該揸私家車喇…平日揸車都讓咗人先，佢載我一定唔會揸快車㗎…」。
相關報道：九龍灣奪命車禍 電單車失控自炒 鐵騎士當場死亡
案發當日，梁小姐指男朋友相約朋友食飯「遊車河」，遂她自行回家，未幾便收到噩耗，「我以為講笑咋，我真係以為講笑咋，我食咗兩啖飯，之後就同媽咪講，我男朋友好似出咗事，我搭的士嗰刻都以為係講笑，點知去到現場，佢啲朋友喺晒度好凝重…..」事後她亦有看過拍到事發一刻的車CAM片，坦言「覺得好慘」。
心情一直未能平伏 黃母：我個心就好似跌左落嚟
死者母親黃太亦向記者表示，自己是單親媽媽，自丈夫病逝後獨力擔起照顧兩名兒子的重任，以擔任保姆的微薄薪金支持一家的開支。她指事發當日她外出工作，至傍晚時分收到長子Ken的朋友來電，「佢朋友話佢唔得喇，斷咗氣，我個心就好似跌左落嚟，我心情失控啦，搭的士去到現場，我都唔敢去睇好驚….有人同我講黑車到，問我上唔上去睇，我好驚震晒，唔敢行過去，心情一直平伏唔到呀」。
相關報道：九龍灣車禍‧車Cam｜電單車避警高速逃捕 休班海關「人肉路障」圖攔車後失事 海關：全力配合調查
連日來，黃太一直未能接受兒子已經離世，不停垂淚，「我而家乜野都諗唔到，淨係知阿仔死得好慘，我真係好難接受呀，佢啱啱讀完書出身，就咁樣走咗，我呢幾日都無瞓過覺，我心情平伏唔到，好難接受，我湊到佢咁大個，投身社會準備成家立室，生兒育女又拍拖，點解現實咁殘忍，我真係接受唔到，真係死得好冤枉」。
黃太又指自己手上的金錢不多，目不識丁，只是擔任家庭保姆，每個月收入不穩定，原本希望長子出外工作後，可以減輕家庭負擔，詎料遭遇突變，一切成泡影，現時連長子的殮葬費都恐成問題，「我有工返就有錢， 無工返就無錢，餐搵餐食餐餐清，本身諗住日後生活靠晒佢，咁我點樣過日子呀？」
