美股於2025年開局表現麻麻，上周道指跌近1.5%、標指跌逾1.5%，納指更跌近2%。傳統上，華爾街一般將每年最後五個交易日及新一年首兩個交易日視作重要指標，若能出現「聖誕老人升市」，則新一年標指表現理想，相反「聖誕老人升市」唔出現，標指則全年往往出現負增長。不過舊年「聖誕老人升市」未有出現，但標指仍累計升24%；所以呢個指標不過係一個參考，唔需要睇得太重要。
美本周公佈失業率及非農數據
展望本周，最受市場關注將會係周五公布嘅美國12月失業率及非農業職位數據。經濟師估計，12月非農業職位將增加15.3萬個，低於前一月嘅22.7萬個；失業率維持4.2%不變，平均時薪料按年升4%。專家指出，有關數據將會係本月底聯儲局議息會議前嘅最重要指標之一。
在2024年最後一季，美國就業市場有冷卻跡象。聯儲局主席鮑威爾喺12月18日曾表示，就業市場呈冷卻但良好，市場進一步冷卻，先可以令通脹有序回落至2%指標。因此，12月非農業職位數據將揭示美國就業市場是否一如鮑威爾所言。
摩根士丹利經濟師Sam Coffin表示，倘若非農數據符合預期，反映美國就業市場確實放緩但仍有力，聯儲局1月底議息時更大可能維持基準利率不變。上周五，利率期貨數據顯示，交易商料儲局1月減息可能性只有11%。非農數據公布前，美國勞工部周三公布嘅上周首次申領失業救濟人數，以及私人轉薪公司ADP公布上月私人市場職位變幅，將會係非農數據預告。
另一個市場焦點係聯儲局周三公布12月議息紀錄；而今晚美國亦會公布服務業PMI及工廠訂單等。投資者希望從中呢啲數據揣測到聯儲局1月議息考量因素及息率路徑。業績方面，達美航空及啤酒商Constellation Brands將公布季績。
恒指19000水平料有支持
至於港股2025年開局亦未如理想，於新一年首兩個交易日累跌300點，主要係人民幣表現疲弱，加上內地公布經濟數據表現麻麻，A股弱勢難免影響港股表現。聖誕及元旦假期過後，緊接本月底農曆新年假期，本月特朗普亦將正式入主白宮，唔少投資者目前仍抱觀望態度。加上暫時亦未見再有新政策公布，亦未到業績期，市場本周預計仍唔會有明顯方向，估計大市仍然係維持區間上落，或於19500至20300之間上落，上下均難見突破。
不過，市場仍憧憬3月內地兩會期間，或再有新政策提振經濟，相信19000水平有不俗支持。
古天后
相關文章
