為配合今年主題「我在 狂歌亂舞」，叱咤903 DJ聯同一眾歌手走訪不同中學，進行一連五場【2024年度叱咤樂壇流行榜頒獎典禮】之「我在校園狂歌亂舞」校園巡演。歌手們與中學生在校園內一齊演出，讓同學們盡情發揮獨特潛能，激發無限的創意，全情投入廣東歌的狂熱之中。
學生將《Back In The Game》重新編舞
叱咤903 DJ 朱薰聯同COLLAR日前走訪梁式芝書院，進行壓軸一場「我在校園狂歌亂舞」。COLLAR 7位成員以校服造型驚喜登場，不但大受同學們歡迎，當聽到同學們想與COLLAR狂歌亂舞，Ivy蘇雅琳及Day許軼即刻走到台下與同學們擊掌及抱抱，突如其來的窩心舉動令同學們深受感動。13位流行舞蹈學會成員將《Back In The Game》重新編舞，在原唱者COLLAR前落力演出，隊形十足，COLLAR大讚同學們表演出色，更即席分享跳舞心得。隨後，COLLAR聯同現場逾130位女同學一齊大合唱《Chosen Family》，並再次走到台下與學生近距離互動，掀起全場熾熱氣氛。
COLLAR因學生表演增添力量
Marf邱彥筒十分享受女同學的演出：「介紹佢哋出場嘅時候，我已經超期待13個人可以點樣跳《Back In The Game》，佢哋仲加入咗Canon（輪跳），剛柔並重，好型、好好睇！」。Sumling李芯駖更因同學們的精彩表演而加添力量：「同學仔嘅演出好有驚喜！冇諗過佢哋會重新編排我哋嘅歌，而且仲自己創作舞步。佢哋又因考試而只得好短嘅時間排練，但喺台上仍然充滿自信、舞步一致。見到佢哋充滿自信嘅表現，即刻帶咗好多力量畀我哋，好多謝同學仔嘅精彩演出。」
回憶昔日校園感覺
此外，原來今次重返校園令Ivy蘇雅琳十分感觸：「我好鍾意校園表演，因為好近距離、貼地、直接，其他場地未必做到呢種氣氛。而我本身讀女校，中學小息時會喺班房同同學一齊唱Dear Jane嘅歌、喺操場跳Big Bang嘅舞。今次轉換成表演者嘅身份返去熟悉嘅女校，令我再次有種Dream comes true嘅感覺。」
