由姜濤、Stanley (邱士縉 )、193（郭嘉駿）合演、改編自大熱韓劇《無用的謊言》即將推出，今日（17日）三子到商台接受鄭裕玲（Do姐）主持的《口水多個浪花》訪問，逾二百名粉絲到場守候，當中姜糖（粉絲暱稱） 佔最多。三子下午3時15分分兩架七人車到達後，全場粉絲瘋狂大叫，在進入商台前，他們亦有企定定跟大家揮手打招呼。
姜濤透露歌曲產量少原因
2024即將完結，Do姐問到三子在這一年定下的目標有否達成，姜濤坦言：「年初嘅時候同公司講咗2024年唔想出太多歌，比自己唞吓，好多關於獎項，音樂有好多壓力，所以今年出咗其中一首歌《好得太過分》就係送俾fans，係感謝大家嘅一年，而自己就儲咗好多歌喺下年先出。」193就笑言：「2024本身定下目標係想有一首歌有人聽，最終係失敗咗（咁咪好慘？ ）唔慘，呢個係一個動力下年再做好啲，其他就係想開心，去多啲旅行見識多啲。」
Do姐就問到姜濤開唔開心？姜濤猶豫了一陣子表示：「……開心……（幾多個巴仙 ？) 60%，我覺得自入行後，快樂指數的確慢慢有下跌趨勢，當然承受嘅嘢越來越多，但經歷好多嘢亦都成長咗好多，所以都OK……開心。」Stanley 就表示：「2024年係一個豐富嘅一年，我哋走tour，我自己今年又多咗好多拍攝機會，拍咗兩套電影，而家拍緊第三套，拍咗《無用的謊言》，而家又準備拍第二套劇，所以好感恩。」
2025年寄望，姜濤就預告會有幾個音樂project，包括有機會出album，以及多首歌曲，以音樂為主；193就表示希望可以同多啲唔同音樂人合作，而且要做好下個月的音樂會。Stanley 就坦言希望一月有份參演的賀歲片票房OK，亦希望可以再拍多啲嘢，以演戲為主。
姜濤為減肥訂下日程表
節目上，Do姐就大讚姜濤消瘦了一點，姜濤就表示還需努力，更透露減肥亦是下年其中一個目標，會好努力證明俾大家睇開始減肥，而現時的減肥大計是：「強迫自己每日開工前早1.5小時跑步，亦有跟一啲球隊早上7至9點去操，打完波去開工，開完工有時間再去打（你可以咁早起身？）為咗打波可以；飲食方面，食得健康啲，其中會食墨西哥菜，墨西哥卷小醬，一日一餐，目標係要減10k。」
提到《無用的謊言》，姜濤花了兩個月時間去拍攝，他坦言今次給了自己一個要求，「想盡量諗多啲關於演戲嘅嘢，以往演戲導演講咩我就會去做，好少自己去思考，今次就會花心思，譬如呢句台詞喺唔改變佢嘅結構情況下，改變少少台詞係啱自己講嘅，將佢生活化。」
Stanley、193怕講多錯多
Do姐亦提到現今有很多Social Media，網上言論對三子有什麼影響？Stanley 表示：「開始唔知邊個係自己，講嘅嘢變得好小心，有時只係開玩笑，但觀眾take嘅未必係一樣，咁就寧願唔講」；193就表示：「唔想講一句嘢都會俾人做咗標題，啱啱入行時講咩都冇人理你，而家多咗人識，講咩都可以成為新聞標題，可能係正面嘢，都俾人解讀做負面嘢。」
姜濤就有感而發表示：「首先我覺得自己有好多嘢都可以俾位人入，係我自己唔啱，9成人都話我好肥，我認，所以我從來冇反駁過關於呢方面嘅嘢！（你對肥呢樣嘢有咩睇法呢？ ）我又好坦蕩地覺得佢哋講得係啱，呢樣嘢係入呢行的確預咗，人類係一個視覺性嘅動物，一定有呢方面嘅嘢。（要去返人地認為標準嘅身材？ ）會呀，都冇辦法，唔想俾呢啲嘢影響，就要fix返個問題。」
姜濤續指自己好少去反駁太多嘢，「有時真係唔認同，就會衝出嚟講，但我由出道到而家，經歷過嘅嘢都冇後悔過，我覺得係上天比我一個養分去成長。」他又認為作為公眾人物，關注度比較高，所以不應該胡亂說話，「我有好多fans都有小朋友，你會知道原來一個公眾人物可以影響個下一代，要有一個正面價值觀比下一代，我覺得係作為artist責任，所以當見到一啲自己覺得啱嘅嘢一定要講。」
會否被評論嚇怕，寧願做別人眼中嘅人版？， Stanley就表示：「會，對於人性，我唔覺得佢哋（評論者）會覺得自己有問題，所以辯駁係冇意思，我唔會同佢坳，我寧願唔會講咁多。」
姜濤今年10月出席活動演唱《蒙著嘴說愛你》時，被質疑「咪嘴」，當時他就用真身account回覆留言，節目上他重提事件，並表示：「話我哋咩都好，但係唔好話我哋假唱，香港嘅傳統就係做artist你唔可以假唱，尤其《蒙》已經唱咗好多次，我唔係假唱嘅時候，你唔會知道呢樣嘢對一個artist嘅專業性好受侮辱。唱得好同唔好可以評論，但違反事實言論，係好受傷害，尤其佢（網民）係呼籲心理健康嘅人。我post佢上story，其實有後悔，但希望大家去睇網上每一個言論時，都去了解返成件事嘅真相。」最後，姜濤表示：「雖然我未做到，但要學識同負面嘅嘢去共存。」
訪問結束後，三子大約4時30分離開，姜濤與Stanley先行步出商台，並行近粉絲與他們打招呼，並收下禮物，而Stanley則大派心心更與粉絲握手；二人離開後，193亦接著現身，同樣與粉絲互動後就離開。
