Babyface雖然對《東張西望》女神梁敏巧（Maggie）作出猛烈攻勢追求，可惜女方拒愛。不過Babyface對愛情仍然抱着希望，早前他轉移視線被發現約前亞視一姐「阿儀」一齊睇樓盤後，原來兩人獲林作撮合相約撐檯腳吃西餐鋸扒，十分浪漫。而林作更踩場向Babyface教路追女招數，希望打動阿儀芳心，不過阿儀似乎不領情表示跟Babyface是「forever Friends」。
林作向Babyface教追女招數
身穿西裝look的Babyface與穿著橫間長袖Tee配襯紅色背心的阿儀，昨晚（10日）於灣仔餐廳撐檯腳吃西餐，可見阿儀十分開胃，鋸完扒又吃意粉。兩人進餐期間，林作突然出現，更向Babyface教路追女招數，不過阿儀一於少理繼續歎美食，並謂：「咪誤會呀！」。林作承認今次飯局由他安排，因為不少網民得知Babyface未能成功追求Maggie，於是提出建議追求「阿儀」，亦覺得兩人合襯。他說：「我覺得不妨試下，點知一試ok！順理成章搵個約會地方，西方浪漫情調餐廳，畀佢哋兩個坐底嚟試下囉！」
林作忠告阿儀「醒吧啦！」
對於可有追女招數推薦Babyface打動阿儀芳心，林作表示打動定打都未知，但吃得西餐需要酒精催眠，希望軟化阿儀，又認為阿儀對Babyface抗拒，並非針對Babyface，而是針對陌生男人，保護意識好強，希望Babyface透過和藹可親外貌同笑容，令阿儀的冰山劈開。談到阿儀有意中人是亞視高層，問到Babyface如何面對情敵？林作坦言要帶阿儀返回現實世界，因為對這位亞視高層的消息略知一二，反而忠告阿儀「醒吧啦！」，而Babyface是附合現實又貼地的選擇。
阿儀拒收Babyface鮮花
談到可會擔心Babyface跟阿儀發展情況，林作表示不太擔心，若然阿儀將自己跟Maggie放在同位置的話，阿儀則要小心幻覺同幻聽問題，又認為Babyface是一位有血有肉男人，阿儀何不一試呢。提到聖誕節，可會提議兩人乘坐「幸福摩天輪」？他說：「晤好咁小學雞，直接打真軍！大家年紀唔細，有返入肉少少。（親咀？）我覺得食色性也，可以拖手就拖手、可以攬下就攬下。」對於可覺兩人會成為一對，林作指愛情好奇妙，覺得不應該一對會走埋一起，哥斯拉打金剛炒埋一碟。問到Babyface是金剛定哥斯拉？他指要交由兩人評論，但是其中一隻走不掉。最搞笑要求Babyface與阿儀合照時，Babyface預備送上一束鮮花，但阿儀見到即叫「唔使喇」，而且抗拒拎住影相，最後束花擺在櫈上在兩人之間，拍照期間發現Babyface未知吃得太飽，連褲頭鈕扣也爆開。
同Babyface係朋友唔係情侶
談到繼早前阿儀被發現跟Babyface睇完樓盤後，今次再度同檯吃飯撐檯腳，阿儀即謂別誤會，跟對方只是朋友。Babyface則解釋上次出席功夫典禮，當時沒事做就行下做朋友傾下偈能否促進友誼。談到林作指他可透過和藹可親外貌同笑容打動阿儀，Babyface則認為打動別人要以真誠。問到阿儀覺得Babyface為人如何？她說：「唔知喎！啲人亂咁整話我。（好多網民想你們成為一對？）唔會啦！係都叫我嚟話多啲job嘛！我當同佢係朋友傾下偈，唔係情侶都可以燭光晚餐架！」
Babyface被派「檸檬」
提到阿儀既玩滑雪又跳鋼管舞，問到可會跟對方一起學習。Babyface笑言無所謂，可以跟黃榕及經理人一齊玩。問到可會跟Babyface出埠玩，阿儀就即謂不會，就算有工作也不會一同去，以免被人講。問到是否有亞視高層心上人而避免誤會？她說：「呢啲唔講啦！」問到Babyface聽完阿儀送贈「檸檬」一番說話可感心碎？Babyface自信滿滿表示在阿儀身上沒有市場，並不代表其他沒有市場，永不放棄，但認為阿儀為人充滿童真，兩人能否發展未來才會知道。阿儀更突然提起跟黃榕的生肖好夾，但跟Babyface的生肖不夾。Babyface自言屬狗，阿儀即謂：「都話唔夾啦！總之唔啱我啦！做朋友可以。（forever Friends？）係呀！」
